خلیج اردو
فلپائن نے متحدہ عرب امارات سے سیاحوں کی آمد بڑھانے کے لیے دبئی میں الیکٹرانک ویزا سسٹم متعارف کرا دیا ہے۔ فلپائنی حکام کو امید ہے کہ آن لائن ویزا کی سہولت سے یو اے ای میں مقیم افراد کے لیے فلپائن کا سفر آسان ہو گا اور سیاحت کو فروغ ملے گا۔
دبئی میں فلپائن کے قونصل جنرل ایمبروسیو برائن ایف اینسیسو سوم نے پیر کو پریس بریفنگ کے دوران بتایا کہ دبئی میں فلپائنی قونصل خانہ دنیا بھر کے ان 94 دیگر سفارتی مشنز میں شامل ہو گیا ہے جہاں اب الیکٹرانک ویزے جاری کیے جا رہے ہیں۔
انہوں نے خلیج ٹائمز سے گفتگو کرتے ہوئے کہا کہ یہ اقدام فلپائن میں سیاحت کو فروغ دینے کی حکمت عملی کا حصہ ہے۔ ان کے مطابق متحدہ عرب امارات کے رہائشی سفر کے دوران سہولت کو ترجیح دیتے ہیں اور الیکٹرانک ویزا کے اجرا سے ان کے لیے فلپائن جانا آسان ہو جائے گا۔
فلپائن جانے والے متعدد ممالک کے شہری پہلے ہی ویزا کے بغیر یا آمد پر ویزا حاصل کرنے کی سہولت سے فائدہ اٹھا رہے ہیں۔ ان میں اماراتی، یورپی، کینیڈین، امریکی اور جنوب مشرقی ایشیائی ممالک کے شہری شامل ہیں۔
اینسیسو کے مطابق الیکٹرانک ویزا سسٹم سے کم از کم 37 ممالک کے شہریوں کو فائدہ ہو گا، جنہیں فلپائن کے سفر کے لیے باقاعدہ ویزا حاصل کرنا پڑتا ہے۔ ان ممالک میں بنگلہ دیش، بھارت، ایران، عراق، مصر، لبنان، فلسطین، پاکستان، سری لنکا، سوڈان، شام، یوکرین اور یمن شامل ہیں۔
فلپائنی قونصل جنرل نے واضح کیا کہ الیکٹرانک ویزا صرف سیاحت کے لیے استعمال کیا جا سکے گا اور اس کے ذریعے ملازمت کی اجازت نہیں ہو گی۔ اس ویزے کی مدت میں توسیع نہیں کی جا سکے گی اور نہ ہی اسے ملازمت یا طالب علم کے ویزے سمیت کسی دوسری قسم کے ویزے میں تبدیل کیا جا سکے گا۔
نئے نظام کے تحت منظور شدہ الیکٹرانک ویزا رکھنے والے مسافر فلپائن پہنچنے پر اپنا ویزا موبائل یا دیگر ڈیجیٹل ڈیوائس پر دکھا سکیں گے یا اس کا پرنٹ پیش کر سکیں گے۔ پاسپورٹ پر ویزے کا روایتی اسٹیکر لگانے کی ضرورت نہیں ہو گی۔
الیکٹرانک ویزا سسٹم کی سرکاری ویب سائٹ evisa.gov.ph ہے۔ یہ نظام انفرادی عارضی وزیٹر ویزوں کی کیٹیگری 9(a) اور دیگر متعلقہ ویزوں کے لیے مشین ریڈ ایبل ویزا اسٹیکرز کے ساتھ بھی کام کرے گا۔
الیکٹرانک ویزا سنگل انٹری اور ملٹی پل انٹری کی اقسام میں دستیاب ہو گا۔ فراہم کردہ معلومات کے مطابق اس کے استعمال میں کاروبار، تفریح، سیاحت، طبی علاج، تربیت، کانفرنس، اجلاس، ورکشاپس اور سیمینارز جیسے مقاصد شامل ہیں۔
