خلیج اردو
عمان نے سرحدی گزرگاہوں کے قریب واقع پیٹرول پمپس پر ایندھن کی خریداری عارضی طور پر محدود کرتے ہوئے فی ری فل 30 لیٹر کی حد مقرر کر دی ہے۔ وزارت تجارت، صنعت اور سرمایہ کاری کے فروغ کے مطابق یہ پابندی قومی سبسڈی کمیٹی کی منظوری کے بعد نافذ کی گئی ہے اور اس کا اطلاق ملک کی سرحدی گزرگاہوں سے 50 کلومیٹر کے دائرے میں موجود پیٹرول پمپس پر ہوگا۔
وزارت کی ڈائریکٹر جنرل نصرہ بنت سلطان الحبسی نے وضاحت کی ہے کہ گاڑیوں کے فیول ٹینک ایک ہی دن میں ایک سے زیادہ مرتبہ بھروائے جا سکتے ہیں۔ تاہم یہ واضح نہیں کیا گیا کہ 30 لیٹر کی حد ہر شخص کے لیے مقرر کی گئی ہے یا فی گاڑی کے حساب سے لاگو ہوگی، جبکہ پابندی ختم کرنے کی تاریخ بھی سامنے نہیں آئی۔
حکام کے مطابق سرحدی علاقوں کے پیٹرول پمپس پر ایندھن کی طلب میں اچانک اضافے کے باعث ذخائر کم ہونے لگے تھے۔ قومی سبسڈی کمیٹی نے یہ اقدام مزید صارفین کے لیے ایندھن کی دستیابی یقینی بنانے، متاثرہ پیٹرول پمپس کی معمول کی سرگرمیاں جاری رکھنے اور ایندھن کے حصول کے لیے طویل قطاروں میں کمی لانے کے لیے منظور کیا ہے۔
حکام نے واضح کیا ہے کہ پابندی صرف سرحدی گزرگاہوں سے 50 کلومیٹر کے اندر واقع پیٹرول پمپس پر لاگو ہوگی، جبکہ عمان کے دیگر علاقوں میں ایندھن کی فروخت معمول کے مطابق جاری رہے گی۔ متاثرہ پیٹرول پمپس پر ایندھن کی دستیابی برقرار رکھنے کے لیے وزارت توانائی و معدنیات، او کیو اور پیٹرولیم مارکیٹنگ کمپنیوں کے ساتھ مل کر اقدامات کیے جا رہے ہیں۔
عمان میں اس وقت ایم 91 پیٹرول کی قیمت 0.229 عمانی ریال فی لیٹر، ایم 95 کی قیمت 0.239 ریال، الٹیمیکس 98 کی قیمت 0.399 ریال جبکہ ڈیزل کی قیمت 0.258 عمانی ریال فی لیٹر ہے۔
وزارت تجارت، صنعت اور سرمایہ کاری کے فروغ نے 22 اکتوبر کو بتایا تھا کہ چار پیٹرول پمپس پر قوانین کی خلاف ورزیوں کا پتا چلا ہے۔ ان پمپس نے ایندھن کی نقل و حمل کے لیے استعمال ہونے والے ٹینکروں کو مقررہ 100 لیٹر کی حد سے زیادہ ایندھن فروخت کیا تھا۔ حکام نے متعلقہ کمپنیوں کے خلاف قانونی کارروائی کی اور پیٹرولیم مارکیٹنگ کمپنیوں اور ان سے منسلک آپریٹرز کو قوانین، ضوابط اور مقررہ شرائط پر عمل درآمد یقینی بنانے کی ہدایت کی۔
وزارت کے مطابق ایندھن کی فروخت کے مراکز کا باقاعدگی سے معائنہ کیا جاتا ہے تاکہ لائسنس کی درستگی، منظور شدہ شرائط اور سرکاری ہدایات پر عمل درآمد کی جانچ کی جا سکے، جبکہ صارفین کو فراہم کی جانے والی خدمات کا معیار بہتر بنانے پر بھی توجہ دی جاتی ہے۔
