خلیج اردو
خلیج ٹائمز نے 2026 کی کے ٹی پلس 150 فہرست متعارف کرا دی، جس میں متحدہ عرب امارات بھر سے تعلق رکھنے والے 150 نوجوانوں کو شامل کیا گیا ہے۔ ان نوجوانوں نے اپنے اپنے شعبوں میں غیر معمولی صلاحیت، مستقبل کے امکانات اور بلند عزائم کا مظاہرہ کیا ہے۔
فہرست میں مصنوعی ذہانت، ای کامرس، ثقافت، آرٹ اینڈ ڈیزائن، توانائی اور رئیل اسٹیٹ سمیت مختلف شعبوں سے تعلق رکھنے والے نوجوان شامل ہیں، جنہوں نے اپنے منفرد انداز میں نئی راہیں متعین کیں اور کامیابی کے روایتی تصورات کو وسعت دی۔
کے ٹی پلس 150 فہرست کو 15 مختلف کیٹیگریز میں تقسیم کیا گیا ہے، تاہم خلیج ٹائمز کے مطابق خطے کے نوجوان کاروباری افراد اور تخلیق کار عموماً کسی ایک شعبے تک محدود نہیں۔ کوئی کھلاڑی میڈیا کمپنی چلا رہا ہے، کوئی شیف اپنا برانڈ بنا رہا ہے، کوئی فنکار ٹیکنالوجی سے وابستہ ہے تو کوئی سائنس دان تعلیم کے شعبے میں بھی کردار ادا کر رہا ہے۔
نوجوانوں کی موجودہ نسل ایسے نئے شعبے تشکیل دے رہی ہے جو چند سال پہلے تک موجود نہیں تھے۔ یہ نوجوان کسی طے شدہ راستے یا رہنما اصول کے بغیر ٹیکنالوجی، میڈیا، سرمایہ کاری اور دیگر شعبوں کے امتزاج سے اپنے لیے نئی راہیں بنا رہے ہیں۔
فہرست میں شامل نوجوانوں کے کام کرنے کے طریقے، تخلیقی عمل اور کاروباری ماڈلز روایتی کاروباری تصورات سے مختلف ہیں۔ ان کی جدت نہ صرف ان کی اپنی ترقی بلکہ ان کی برادریوں اور متحدہ عرب امارات کے لیے بھی نئے امکانات پیدا کر رہی ہے۔
خلیج ٹائمز نے گزشتہ سال پہلی مرتبہ کے ٹی پلس 150 فہرست جاری کی تھی اور اس وقت اسے ایک ایسی کمیونٹی قرار دیا تھا جو وقت کے ساتھ وسعت اختیار کرے گی اور نمایاں مقام حاصل کرے گی۔ رواں سال اس سلسلے کو آگے بڑھاتے ہوئے نئے نوجوانوں کو فہرست میں شامل کیا گیا ہے۔
خلیج ٹائمز نے تمام منتخب نوجوانوں کو مبارک باد دیتے ہوئے امید ظاہر کی ہے کہ ان کے عزائم اور کامیابیوں کو اجاگر کرنے سے متحدہ عرب امارات اور دنیا بھر کے دیگر نوجوان بھی متاثر ہوں گے۔
