خلیج اردو
دبئی: متحدہ عرب امارات کی شاندار افق میں ایک اور شاہکار کا اضافہ ہونے جا رہا ہے، جہاں بدھ کے روز ٹرمپ انٹرنیشنل ہوٹل اینڈ ٹاور کے قیام کا باقاعدہ اعلان کیا گیا۔ یہ شاندار 80 منزلہ عمارت دبئی کے قلب، شیخ زاید روڈ اور برج خلیفہ کے قریب تعمیر کی جائے گی، جس میں پرتعیش رہائشی اپارٹمنٹس، ہوٹل سہولیات، اور صرف اراکین کے لیے مخصوص ٹرمپ پرائیویٹ کلب شامل ہوگا۔
یہ منصوبہ لندن میں رجسٹرڈ لگژری رئیل اسٹیٹ کمپنی دار گلوبل اور دی ٹرمپ آرگنائزیشن کے درمیان اشتراک سے تیار کیا جا رہا ہے۔ اس سے قبل دونوں ادارے جدہ میں ٹرمپ ٹاور، اور عمان میں ٹرمپ انٹرنیشنل گالف کلب و ہوٹل جیسے منصوبوں پر بھی تعاون کر چکے ہیں۔
ایرک ٹرمپ، جو ٹرمپ آرگنائزیشن کے ایگزیکٹو نائب صدر ہیں، نے کہا: "ٹرمپ انٹرنیشنل ہوٹل اینڈ ٹاور دبئی، ہمارے معیار، لگژری اور جدت کے عزم کی علامت ہے۔ دبئی کے ساتھ ہمارا اشتراک قابل فخر ہے، کیونکہ یہ دنیا کے سب سے متحرک شہروں میں سے ایک ہے۔”
اس عمارت میں نیویارک کے ففتھ ایونیو پر واقع ٹرمپ پینٹ ہاؤس سے متاثر ہو کر بنائے گئے دو خصوصی ڈوپلیکس پینٹ ہاؤسز ہوں گے، جن میں اسکائی پولز بھی شامل ہوں گے۔ ان میں فرش سے چھت تک شیشے کی دیواریں نصب ہوں گی، جو دبئی کے دلکش نظارے پیش کریں گی۔
دنیا کا سب سے بلند آؤٹ ڈور سوئمنگ پول
ٹرمپ ٹاور دبئی کی ایک نمایاں خصوصیت اس کا دنیا کا سب سے بلند آؤٹ ڈور سوئمنگ پول ہے، جو صرف رہائشیوں کے لیے مخصوص ہوگا۔ یہ سوئمنگ پول دبئی کے پینورامک نظارے پیش کرے گا اور مہمانوں کو ایک ناقابلِ فراموش تجربہ فراہم کرے گا۔
تقریباً 350 میٹر بلند یہ عمارت پرائیویٹ لاؤنجز، ذاتی نوعیت کی سروسز، اور دیگر شاندار سہولیات سے آراستہ ہوگی۔ اس میں ‘دی ٹرمپ’ نامی پرائیویٹ، ممبرز اونلی کلب بھی شامل ہوگا۔
دار گلوبل کے سی ای او زیاد الشاعر نے کہا: "دبئی کی معیشت کی تیزی اور اس کی اسٹریٹجک پوزیشن عالمی سرمایہ کاری کے لیے اسے ایک مثالی مقام بناتی ہے۔ ٹرمپ ٹاور سرمایہ کاروں کو دبئی کی ترقی میں شامل ہونے کا منفرد موقع فراہم کرتا ہے۔
