خلیج اردو
شارجہ – شارجہ پولیس نے ایک کامیاب مشترکہ کارروائی کے دوران 3.5 ملین نشہ آور کیپٹاگون گولیاں ضبط کر لیں، جن کی مالیت 1 کروڑ 90 لاکھ درہم سے زائد بتائی جا رہی ہے۔ اس خصوصی آپریشن کو ‘باطن الظلام’ (Bottom of Darkness) کا نام دیا گیا۔
یہ بڑی کارروائی ابوظبی پولیس کے اشتراک سے کی گئی، جس میں منشیات فروشوں کے ایک گینگ کو بے نقاب کیا گیا جو نوجوانوں کو نشانہ بنا کر نشہ آور گولیاں فروخت کرنے کی کوشش کر رہا تھا۔
حکام کے مطابق ملزمان گولیوں کو چھپانے کے لیے جدید چھپاؤ کے طریقے استعمال کر رہے تھے، جنہیں مسلسل نگرانی اور انٹیلیجنس کے ذریعے بے نقاب کیا گیا۔
آپریشن کے دوران مجموعی طور پر 585 کلوگرام وزنی کیپٹاگون گولیاں قبضے میں لی گئیں۔
شارجہ پولیس نے اس کامیاب کارروائی کی ویڈیو بھی جاری کی ہے، جس میں ضبط شدہ نشہ آور مواد اور آپریشن کی تفصیلات دکھائی گئی ہیں۔
پولیس حکام نے نوجوانوں کو منشیات سے محفوظ رکھنے کے عزم کا اعادہ کرتے ہوئے کہا ہے کہ منشیات کے خلاف زیرو ٹالرنس پالیسی جاری رہے گی اور معاشرے کے تحفظ کے لیے ایسی کارروائیاں مزید تیز کی جائیں گی۔
