متحدہ عرب امارات: ایران-اسرائیل جنگ کے بعد جولائی میں پیٹرول کی قیمتیں بڑھیں گی یا کم ہوں گی؟

خلیج اردو
ابوظہبی: متحدہ عرب امارات میں جولائی کے مہینے کے لیے پیٹرول کی قیمتوں میں ممکنہ اضافے کا امکان ظاہر کیا جا رہا ہے، کیونکہ رواں ماہ کے آغاز میں ایران اور اسرائیل کے درمیان جنگ کے بعد عالمی منڈی میں خام تیل کی قیمتوں میں نمایاں اضافہ ہوا۔

جنگ کے دوران نہ صرف اسرائیل اور ایران آمنے سامنے آئے بلکہ امریکی حملے بھی ایرانی جوہری تنصیبات پر ہوئے، جس کے بعد برینٹ کروڈ آئل کی قیمتیں اوسطاً 69.87 ڈالر فی بیرل تک جا پہنچیں، جبکہ گزشتہ ماہ یہ 63.6 ڈالر پر تھیں۔ ایک وقت میں برینٹ آئل 80 ڈالر فی بیرل کے قریب پہنچ گیا تھا۔

سوئس کوٹ بینک کے سینئر تجزیہ کار ایپیک اوزکارڈیسکایا کے مطابق اگرچہ جغرافیائی کشیدگی نے عارضی طور پر قیمتوں کو اوپر دھکیلا، مگر عالمی مارکیٹ میں طلب میں کمی اور اوپیک پلس ممالک کی جانب سے رسد میں بہتری کی وجہ سے قیمتوں پر دباؤ ہے۔

ان کا کہنا تھا: "اگر مشرق وسطیٰ میں کشیدگی واقعی ختم ہو گئی ہے تو خام تیل کی قیمتیں 60 ڈالر فی بیرل تک یا اس سے بھی نیچے واپس جا سکتی ہیں۔”

متحدہ عرب امارات میں جون کے مہینے میں فیول پرائس کمیٹی نے پیٹرول کی قیمتیں برقرار رکھی تھیں۔ اس وقت سپر 98 پیٹرول 2.58 درہم، اسپیشل 95 پیٹرول 2.47 درہم، اور ای-پلس 91 پیٹرول 2.39 درہم فی لیٹر پر فروخت ہو رہا ہے۔

اگرچہ جولائی میں پیٹرول کی قیمتوں میں اضافے کا امکان موجود ہے، مگر حتمی اعلان آئندہ پیر کو کیا جائے گا۔ یاد رہے، یو اے ای نے 2015 میں پیٹرول قیمتوں کو ڈی ریگولیٹ کر دیا تھا، اور تب سے ہر مہینے عالمی منڈی کے مطابق قیمتوں پر نظر ثانی کی جاتی ہے۔