خلیج اردو
راس الخیمہ: صنعتی علاقے الحلیلہ میں ایک بڑی فیکٹری میں لگنے والی شدید آگ کو پانچ گھنٹے طویل مشترکہ کارروائی کے بعد مکمل طور پر قابو میں کر لیا گیا۔ آگ بجھانے کی کارروائی میں مقامی اور وفاقی اداروں سمیت سول ڈیفنس، فوج، نیشنل گارڈ، ایمبولینس، سرچ اینڈ ریسکیو ٹیمیں، مختلف امارات کی فائر بریگیڈ اور دیگر محکمے شامل تھے۔
حکام نے تصدیق کی ہے کہ آگ کے باوجود کوئی جانی نقصان نہیں ہوا۔ راس الخیمہ پولیس کے کمانڈر انچیف میجر جنرل علی عبداللہ بن علوان النعیمی کے مطابق تیز رفتار اور مربوط فیلڈ رسپانس نے نہ صرف آگ پر قابو پایا بلکہ اسے قریبی فیکٹریوں اور گوداموں تک پھیلنے سے بھی روک دیا، جو ایک بڑے سانحے کا سبب بن سکتا تھا۔
آگ کی اطلاع ملتے ہی راس الخیمہ کی ایمرجنسی پلان فوری طور پر فعال کر دی گئی۔ دبئی، شارجہ، عجمان، ام القوین، فجیرہ اور راس الخیمہ سے سول ڈیفنس کی ٹیموں کے علاوہ متحدہ عرب امارات کی وزارت دفاع، قومی بحران و آفات انتظامیہ، نیشنل گارڈ، نیشنل ایمبولینس، راس الخیمہ میونسپلٹی، اتحاد واٹر اینڈ الیکٹریسٹی، بندرگاہی حکام، ہلال احمر اور دیگر ادارے موقع پر پہنچے۔
آگ بجھانے کے بعد تکنیکی اور فرانزک ٹیموں نے موقع پر تحقیقات کا آغاز کر دیا ہے تاکہ آگ کی ممکنہ وجوہات کا تعین کیا جا سکے اور مادی نقصان کا جائزہ لیا جا سکے۔ میجر جنرل بن علوان نے تمام اداروں کا شکریہ ادا کرتے ہوئے کہا کہ اس کامیاب کارروائی نے راس الخیمہ کی ہنگامی حالات سے نمٹنے کی اعلیٰ صلاحیت اور تیاری کو ثابت کیا ہے۔
آگ کے دوران پولیس نے عوام سے متاثرہ علاقے سے دور رہنے، متبادل راستے اختیار کرنے اور صرف مصدقہ ذرائع سے معلومات حاصل کرنے کی ہدایت کی تھی۔
