خلیج اردو
ابوظبی: ابوظبی کی کریمنل کورٹ نے ایک شخص کو 10 سال قید کی سزا سناتے ہوئے رہائی کے بعد متاثرہ بچے کے گھر کے قریب رہائش اختیار کرنے پر پابندی عائد کر دی ہے۔ مجرم پر الزام تھا کہ اس نے زبردستی ایک 10 سالہ بچے کو اپنی نجی گاڑی میں لے جا کر جنسی زیادتی کا نشانہ بنایا۔
پولیس کو یہ واقعہ اس وقت رپورٹ ہوا جب بچے کے قریبی رشتہ دار نے اطلاع دی کہ ملزم نے رہائشی علاقے میں بچے کو اپنی گاڑی میں بٹھایا اور اسے زیادتی کا نشانہ بنایا۔ ابوظبی پبلک پراسیکیوشن نے فوری تحقیقات کا آغاز کیا جس کے دوران شواہد سے ملزم کی گاڑی کی جائے وقوعہ پر موجودگی ثابت ہوئی۔ سی سی ٹی وی فوٹیج میں ملزم کی گاڑی کو ایک اسکول کے قریب طویل وقت تک کھڑا دیکھا گیا جس کے بعد وہ علاقے سے روانہ ہو گیا۔
عدالت نے کہا کہ مجرم کا عمل نہایت سنگین نوعیت کا تھا جو نہ صرف متاثرہ بچے کی زندگی پر اثرانداز ہوا بلکہ معاشرتی سطح پر بھی اس کے گہرے اثرات مرتب ہوئے۔ عدالت نے مجرم کے خلاف سخت سزا سناتے ہوئے اسے رہائی کے بعد متاثرہ کے گھر کے قریبی علاقوں میں رہنے سے روک دیا۔
واضح رہے کہ متحدہ عرب امارات میں بچوں کے حقوق کے تحفظ کے لیے سخت قوانین نافذ ہیں۔ 2016 میں ودیمہ لا (Wadeema’s Law) نافذ کیا گیا تھا جو بچوں کو جسمانی، ذہنی اور جنسی استحصال سے بچانے کے لیے ایک جامع قانونی فریم ورک فراہم کرتا ہے۔ یہ قانون تمام اماراتی اور غیر ملکی بچوں پر لاگو ہوتا ہے اور ان کے تحفظ، تعلیم، صحت اور فلاح و بہبود کو یقینی بناتا ہے۔
بچوں کے خلاف جنسی جرائم پر سخت سزائیں دی جانا ودیمہ لا کے تحت ایک واضح پیغام ہے کہ امارات میں بچوں کے تحفظ پر کوئی سمجھوتہ نہیں کیا جائے گا۔
