خلیج اردو
دبئی انٹرنیشنل ایئرپورٹ (DXB) نے اعلان کیا ہے کہ اس نے 2025 کی پہلی ششماہی (جنوری تا جون) میں 4 کروڑ 60 لاکھ مسافروں کا خیرمقدم کیا، جو اس کی تاریخ کی مصروف ترین ششماہی ثابت ہوئی، حالانکہ مئی اور جون میں خطے میں جغرافیائی سیاسی کشیدگی کے باعث فضائی ٹریفک متاثر رہی۔
دنیا کے مصروف ترین بین الاقوامی ہوائی اڈے نے سال بہ سال 2.3 فیصد اضافہ ریکارڈ کیا۔ صرف دوسری سہ ماہی میں DXB نے 2 کروڑ 25 لاکھ مسافروں کو خوش آمدید کہا، جو گزشتہ سال کی اسی مدت کے مقابلے میں 3.1 فیصد زیادہ ہے۔
دبئی ایئرپورٹس کے مطابق، اپریل دوسری سہ ماہی کا مصروف ترین مہینہ رہا، جس میں 80 لاکھ مسافروں کی آمد و رفت ریکارڈ کی گئی، جو تاریخ کا مصروف ترین اپریل بھی ثابت ہوا۔
اگرچہ ایران-اسرائیل فضائی کشیدگی کے باعث خطے کے کئی ممالک نے اپنے فضائی حدود تجارتی پروازوں کے لیے عارضی طور پر بند کر دی تھیں، اس کے باوجود DXB کا ماہانہ اوسط مسافر ٹریفک 77 لاکھ رہا، جبکہ روزانہ کی بنیاد پر اوسط 2 لاکھ 54 ہزار مسافر گزرے۔ جنوری اس عرصے کا مصروف ترین مہینہ تھا، جس میں 85 لاکھ مسافروں کا ریکارڈ قائم ہوا۔
دبئی ایئرپورٹس کے سی ای او پال گرفِتھس نے کہا: "DXB کا اس مشکل دور میں بھی ترقی جاری رکھنا دبئی اور یو اے ای کی مضبوطی، آپریشنز کی چابکدستی اور ہمارے ایئرپورٹ کمیونٹی کے عزم کا مظہر ہے۔”
اس وقت DXB دنیا کے 107 ممالک میں 269 سے زائد مقامات سے منسلک ہے، جہاں 92 سے زیادہ بین الاقوامی ایئرلائنز اپنی خدمات فراہم کر رہی ہیں۔
سفر کی سرگرمیوں کا مستقبل
پال گرفِتھس نے کہا کہ سفر کی سرگرمیوں میں مزید تیزی متوقع ہے، خاص طور پر موسم گرما کے اختتام اور موسم سرما میں ہونے والے بڑے عالمی پروگرامز کے باعث۔ انہوں نے خاص طور پر "دبئی ایئرشو 2025” کا ذکر کیا جو نئے ریکارڈز قائم کرنے اور ہوا بازی کے شعبے کے مستقبل کی جھلک دکھانے والا ہے۔
انہوں نے پیشگوئی کی کہ 2025 کے اختتام تک DXB کا مسافر ٹریفک 9 کروڑ 60 لاکھ تک پہنچ جائے گا، جو 10 کروڑ کے "علامتی سنگ میل” سے محض کچھ فاصلے پر ہوگا۔
سہولیات میں بہتری
2025 کی پہلی ششماہی میں 99.2 فیصد مسافروں نے روانگی کے وقت 10 منٹ کے اندر امیگریشن کلیئر کی، 98.4 فیصد نے آمد کے وقت 15 منٹ کے اندر اور 98.7 فیصد نے سیکیورٹی چیک 5 منٹ کے اندر مکمل کیا۔
اہم مارکیٹس
بھارت بدستور DXB کی سب سے بڑی مسافر مارکیٹ رہا، جہاں سے 59 لاکھ مسافر سفر کر کے دبئی پہنچے، اس کے بعد سعودی عرب (36 لاکھ)، برطانیہ (30 لاکھ)، پاکستان (21 لاکھ) اور امریکہ (16 لاکھ) رہے۔ لندن 18 لاکھ مسافروں کے ساتھ مصروف ترین شہر رہا، اس کے بعد ریاض (15 لاکھ)، ممبئی (12 لاکھ)، جدہ اور نئی دہلی (11 لاکھ)، اور استنبول (9.82 لاکھ) شامل ہیں۔
دیگر اعداد و شمار
ایئرپورٹ نے سال کے پہلے چھ مہینوں میں کل 2 لاکھ 22 ہزار پروازیں سنبھالیں، جبکہ لوڈ فیکٹر 76 فیصد رہا۔ اس دوران 4 کروڑ 18 لاکھ بیگز پروسیس کیے گئے، جن میں سے 91 فیصد 45 منٹ کے اندر مسافروں تک پہنچا دیے گئے۔ بیگیج گم ہونے کی شرح صرف 2 فی 1,000 مسافر رہی، جو عالمی اوسط 6.3 کے مقابلے میں نمایاں طور پر بہتر ہے۔ سال کے اختتام تک DXB 8 کروڑ 50 لاکھ سے زیادہ بیگز پروسیس کرنے کی راہ پر گامزن ہے، جو 2024 میں قائم 8 کروڑ 12 لاکھ کے ریکارڈ سے بھی زیادہ ہوگا۔
