خلیج اردو – ابوظبی
ابوظبی کی کورٹ آف کیسیشن نے جائیداد کے مالک کو حکم دیا ہے کہ وہ ایک ٹھیکیدار کو 3 لاکھ 32 ہزار 990 درہم سے زائد کی رقم ادا کرے۔ یہ فیصلہ دونوں فریقین کے درمیان تعمیراتی تنازع کے بعد سنایا گیا۔
جمعرات 7 اگست کو عدالت نے جائیداد کے مالک کی اپیل مسترد کر دی، جو اس سے قبل دیے گئے حکم کو چیلنج کرنے کے لیے دائر کی گئی تھی۔ عدالت نے اپیل کو اس بنیاد پر ناقابل سماعت قرار دیا کہ کیسیشن کورٹ میں اپیل کا کم از کم مالی معیار 5 لاکھ درہم ہے، جبکہ دعویٰ اس سے کم رقم کا تھا، لہٰذا فیصلہ حتمی اور قابلِ نفاذ ہے۔
مقدمے کی تفصیلات کے مطابق جائیداد کے مالک اور ٹھیکیدار کے درمیان تعمیراتی کام کے حوالے سے تنازع پیدا ہوا تھا۔ ابتدائی طور پر ایک مقدمے میں ٹھیکیدار کو مالک کو 2 لاکھ 50 ہزار درہم ادا کرنے کا حکم دیا گیا تھا۔ بعدازاں ٹھیکیدار نے علیحدہ مقدمہ دائر کیا، جس میں مالک سے 3 لاکھ 32 ہزار 990 درہم کی ادائیگی کا مطالبہ کیا گیا، جو مکمل شدہ تعمیراتی کام کا معاوضہ تھا۔ اس کے ساتھ 12 فیصد سالانہ شرح سود کا بھی مطالبہ کیا گیا تھا۔
ٹیکنیکل ماہر کی رپورٹ میں تصدیق کی گئی کہ معاہدے کے تحت تقریباً 89 فیصد کام مکمل کیا جا چکا ہے۔ اس بنا پر عدالت نے مالک کو حکم دیا کہ وہ ٹھیکیدار کو اصل رقم کے ساتھ 5 فیصد سالانہ سود، ایک ہزار درہم وکیل کی فیس اور عدالتی اخراجات بھی ادا کرے۔
