خلیج اردو
یو اے ای کے ڈرائیورز وزارت داخلہ کے ’ایکسڈنٹ فری ڈے‘ عہد کے لیے بڑی تعداد میں رجسٹریشن کر رہے ہیں، جس کے تحت 25 اگست 2025 کو محفوظ ڈرائیونگ کا وعدہ کرنے اور اس پر عمل کرنے والے ڈرائیورز کے ٹریفک ریکارڈ سے چار بلیک پوائنٹس کم کر دیے جائیں گے۔
یہ مہم نئے تعلیمی سال کے پہلے دن کے ساتھ منسلک ہے اور اس کا مقصد سڑکوں پر حفاظت کے شعور کو اجاگر کرنا اور ٹریفک خلاف ورزیوں میں کمی لانا ہے، خاص طور پر اسکول زونز میں جہاں بچوں کی حفاظت اولین ترجیح ہے۔
29 سالہ احمد سلیم نے کہا:
’’میرے پاس اس وقت 12 بلیک پوائنٹس ہیں، زیادہ تر تیز رفتاری کی وجہ سے۔ چار پوائنٹس کی کٹوتی ایک ریلیف ہے۔ یہ عہد مجھے یاد دلاتا ہے کہ سڑک پر زیادہ نظم و ضبط کے ساتھ چلنا چاہیے۔‘‘
کئی موٹرسواروں نے اس اقدام کا خیرمقدم کیا۔ احمد کے دوست نے رجسٹر کرنے کا مشورہ دیتے ہوئے کہا: ’’امید ہے اس بار تم کچھ سیکھو گے‘‘۔
41 سالہ خالد منصور، جو تقریباً دو دہائیوں سے یو اے ای میں ڈرائیونگ کر رہے ہیں، نے کہا کہ یہ ایک مثبت ذہنی مشق ہے:
’’میں اپنی اسپیڈ پر نظر رکھوں گا، فون استعمال کرنے جیسے خلفشار سے بچوں گا، اور دوسروں کو راستہ دوں گا۔ یہ میری ڈرائیونگ عادات کے لیے ری سیٹ بٹن جیسا ہے۔‘‘
شرائط کے مطابق ڈرائیورز کو سیٹ بیلٹ پہننا، مقررہ اسپیڈ لمٹ سے تجاوز نہ کرنا، محفوظ فاصلہ رکھنا، پیدل چلنے والوں کو ترجیح دینا، فون کا استعمال نہ کرنا اور ایمرجنسی گاڑیوں کو راستہ دینا ضروری ہے۔
29 سالہ فاطمہ علی، جو شارجہ میں رہتی ہیں، نے کہا کہ وہ اس مہم سے اپنے موجودہ چھ بلیک پوائنٹس کم ہونے کی امید رکھتی ہیں۔ ان کا کہنا تھا کہ اسکول کھلنے کے دنوں میں احتیاط مزید ضروری ہو جاتی ہے۔
یہ عہد وزارت داخلہ کے آن لائن پورٹل پر دستیاب ہے۔ جو ڈرائیور پورا دن بغیر کسی خلاف ورزی کے مکمل کریں گے، ان کے پوائنٹس 15 ستمبر 2025 کو الیکٹرانک طور پر کم کر دیے جائیں گے، کسی سروس سینٹر جانے کی ضرورت نہیں ہوگی۔
وفاقی ٹریفک کونسل کے چیئرمین بریگیڈیئر انجینئر حسین احمد الحارثی نے کہا:
’’ہمارا مقصد ٹریفک قوانین کی پابندی کو فروغ دے کر تمام روڈ یوزرز کے لیے محفوظ ماحول پیدا کرنا ہے۔
