عجمان میں عید میلاد النبیؐ پر عام تعطیل کا اعلان

خلیج اردو
عجمان حکومت کے محکمہ انسانی وسائل نے سرکاری اداروں کے لیے ایک سرکلر جاری کرتے ہوئے اعلان کیا ہے کہ اس سال عید میلاد النبیؐ کی تعطیل جمعہ 5 ستمبر 2025 کو ہوگی۔ اس طرح عجمان کے رہائشیوں کے لیے ایک طویل ویک اینڈ میسر آئے گا۔

اس موقع پر محکمہ انسانی وسائل نے متحدہ عرب امارات کی قیادت، حکومت اور عوام کے ساتھ ساتھ عرب اور اسلامی دنیا کو بھی مبارکباد پیش کی اور دعا کی کہ یہ موقع سب کے لیے برکت اور خوشحالی کا باعث بنے۔

یاد رہے کہ متحدہ عرب امارات کی حکومت پہلے ہی اعلان کر چکی ہے کہ جمعہ 5 ستمبر کو سرکاری اور نجی شعبے کے تمام ملازمین کو عید میلاد النبیؐ کی مناسبت سے تعطیل دی جائے گی، جس کے نتیجے میں زیادہ تر ملازمین کو تین دن کا ویک اینڈ حاصل ہوگا۔

دبئی حکومت کے محکمہ انسانی وسائل (DGHR) نے بھی واضح کیا ہے کہ تمام سرکاری ادارے اور محکمے جمعہ 13 ربیع الاول 1447 ہجری، مطابق 5 ستمبر 2025 کو تعطیل منائیں گے، جبکہ سرکاری فرائض پیر 8 ستمبر 2025 سے معمول کے مطابق بحال ہوں گے۔