پِنک کیرَوَن مہم کے دائرہ کار میں توسیع، العین اور خورفکان میں دو نئے کلینکس کا اضافہ

خلیج اردو

شارجہ: متحدہ عرب امارات کی فریینڈز آف کینسر پیشنٹس (FOCP) تنظیم نے اپنی معروف "پِنک کیرَوَن” مہم کے دائرہ کار میں توسیع کرتے ہوئے اس سال العین اور خورفکان میں دو نئے مستقل کلینکس قائم کیے ہیں تاکہ ملک بھر میں مفت بریسٹ کینسر اسکریننگ کی سہولت مزید عام کی جا سکے۔

فریینڈز آف کینسر پیشنٹس کے سربراہ برائے کارپوریٹ کمیونیکیشن راشد العامری نے بتایا کہ یہ نئے کلینکس عوامی ضروریات اور پچھلی مہمات سے حاصل شدہ فیڈ بیک کی بنیاد پر قائم کیے گئے ہیں۔ انہوں نے کہا کہ "اس سال ہم نے خورفکان ہسپتال اور العین میں مستقل کلینکس کا اضافہ کیا ہے تاکہ ان علاقوں تک بھی رسائی حاصل کی جا سکے جہاں پہلے یہ سہولت محدود تھی۔”

مہم کے تحت العادہ میں کمیونٹی ایونٹ بھی دوبارہ متعارف کرایا گیا ہے جبکہ مردوں کے اسکریننگ کلینکس کی تعداد ایک سے بڑھا کر دو کر دی گئی ہے۔ خواتین کے لیے بریسٹ کینسر اسکریننگ کی گنجائش میں بھی اضافہ کیا گیا ہے۔

گزشتہ سال پِنک کیرَوَن مہم کے ذریعے تقریباً 16 ہزار افراد کی اسکریننگ کی گئی تھی، جب کہ نئے کلینکس اور مختلف اداروں کے ساتھ اشتراک کے ذریعے اس سال تقریباً 17 ہزار افراد تک پہنچنے کا ہدف رکھا گیا ہے۔

راشد العامری نے بتایا کہ نئے کلینکس کے مقامات عوامی طلب اور سہولت کی بنیاد پر منتخب کیے گئے۔ "ہم نے مشاہدہ کیا کہ العین میں اپوائنٹمنٹس دیگر امارات کی نسبت کم تھیں، جبکہ خورفکان میں کارپوریٹ بُکنگز محدود تھیں، لہٰذا وہاں مستقل کلینکس کا قیام ضروری سمجھا گیا تاکہ مقامی آبادی آسانی سے اس سہولت سے فائدہ اٹھا سکے۔”

انہوں نے مزید بتایا کہ FOCP ان مریضوں کو مالی اور جذباتی مدد فراہم کرتی ہے جو علاج کے اخراجات برداشت نہیں کر سکتے۔ "مریض مالی امداد کے لیے درخواست دے سکتے ہیں، جب کہ ہم کینسر سے صحتیاب ہونے والوں اور ان کے اہل خانہ کے لیے باقاعدہ سپورٹ سیشنز کا انعقاد بھی کرتے ہیں۔”

ریڈیالوجی اسپیشلسٹ ڈاکٹر رحمت خاتون نے بتایا کہ کلینکس میں کلینیکل بریسٹ ایگزامینیشنز اور اسکریننگ میموگرامز کی سہولت دستیاب ہے، جن کا مقصد بروقت تشخیص کے ذریعے کینسر کے خطرے کو کم کرنا ہے۔ ان کا کہنا تھا کہ "ہم خواتین کو خود سے معائنہ کرنے کا طریقہ بھی سکھاتے ہیں اور انہیں باقاعدگی سے ایسا کرنے کی ترغیب دیتے ہیں۔”

ڈاکٹر رحمت خاتون کے مطابق خود معائنہ بریسٹ کینسر کی ابتدائی نشاندہی کے لیے اہم قدم ہے۔ انہوں نے مشورہ دیا کہ "بریسٹ کے سائز، شکل یا ساخت میں کسی بھی غیر معمولی تبدیلی کی صورت میں فوراً ڈاکٹر سے رجوع کرنا چاہیے۔”

انہوں نے بتایا کہ کلینیکل معائنہ ماہرین کے ذریعے بصری اور دستی طور پر کیا جاتا ہے، اور اگر کسی غیر معمولی علامت کی نشاندہی ہو تو مریض کو مزید ٹیسٹ جیسے میموگرام کے لیے بھیجا جاتا ہے۔ ان کا کہنا تھا کہ "ہم تجویز کرتے ہیں کہ 20 سال سے زائد عمر کی خواتین ہر دو سال بعد کلینیکل معائنہ کروائیں جبکہ 40 سال سے زائد عمر کی خواتین سالانہ بنیاد پر یہ ٹیسٹ کروائیں۔”

ڈاکٹر خاتون نے مزید وضاحت کی کہ اسکریننگ میموگرام کے ذریعے ایسے ٹیومرز کا پتہ لگایا جا سکتا ہے جو ظاہری طور پر دکھائی یا محسوس نہیں ہوتے۔ "ایکس رے امیجنگ سے کینسر کے خلیات کو ابتدائی مرحلے میں شناخت کرنا ممکن ہو جاتا ہے۔”

مزید تشخیص کے لیے مریضوں کو الٹراساؤنڈ یا ایم آر آئی جیسے اضافی ٹیسٹ کی طرف بھی بھیجا جا سکتا ہے۔

پِنک کیرَوَن ایونٹ، جو سالانہ "پِنک اکتوبر” آگاہی مہم کا حصہ ہے، 10 سے 12 اکتوبر تک الشارجہ کے العادہ میں شام 5 بجے سے رات 11 بجے تک منعقد ہوگا۔ تین روزہ اس ایونٹ میں مفت اسکریننگ، تعلیمی ورکشاپس اور خاندانی تفریحی سرگرمیاں شامل ہوں گی جن کا مقصد بروقت تشخیص اور سماجی آگاہی کو فروغ دینا ہے۔