خلیج اردو
شارجہ، 12 اکتوبر 2025
شارجہ پولیس نے ایک ایشیائی گروہ کو گرفتار کر لیا ہے جو جعلی رسیدوں کے ذریعے گاڑی فروخت کرنے والوں کو دھوکا دے رہا تھا۔ پولیس نے یہ کارروائی صرف 12 گھنٹوں میں ایک خصوصی آپریشن کے دوران انجام دی۔
پولیس کے مطابق ملزمان آن لائن ویب سائٹس اور سوشل میڈیا پلیٹ فارمز پر گاڑیاں فروخت کرنے والے افراد کو نشانہ بناتے تھے۔ وہ گاڑی خریدنے کا جھوٹا بہانہ کر کے جعلی بینک ٹرانسفر کی رسیدیں بھیجتے اور متاثرہ افراد کو یہ یقین دلاتے کہ رقم منتقل ہو چکی ہے، تاہم بینک اکاؤنٹ میں پہنچنے میں وقت لگے گا۔ متاثرہ شخص نیک نیتی کے تحت گاڑی ان کے حوالے کر دیتا اور بعد میں پتہ چلتا کہ وہ جعلسازی کا شکار ہو چکا ہے۔
ڈائریکٹر انویسٹی گیشن اینڈ کرمنل انویسٹی گیشن، کرنل ڈاکٹر خلیفہ بالحی نے بتایا کہ پولیس کو ایک شکایت موصول ہوئی تھی جس کے بعد خصوصی تفتیشی ٹیم تشکیل دی گئی۔ تحقیقات میں انکشاف ہوا کہ گروہ کا ایک رکن منصوبہ بندی اور باقی افراد کے درمیان کام کی تقسیم کا ذمہ دار تھا۔
گروہ جعلی شناختی کارڈ اور بینک ٹرانسفر رسیدیں استعمال کر کے متاثرین کو قائل کرتا کہ رقم منتقل کر دی گئی ہے۔ جب گاڑی مخصوص مقام پر پہنچتی تو وہ اسے قبضے میں لے کر فوری طور پر نمبر پلیٹس ہٹا دیتے اور فروخت کنندہ سے رابطہ منقطع کر دیتے۔
