دشمن کے انتشار، افراتفری پھیلانے کے منصوبے ناکام بنائیں گے ،جنرل باجوہ

راولپنڈی: ( خلیج اردو )پاک فوج کے شعبہ تعلقات عامہ آئی ایس پی آر کی جانب سے جاری پریس ریلیز میں بتایا گیا ہے کہ آرمی چیف جنرل قمر جاوید باجوہ نے شمالی وزیرستان کے سرحدی علاقے کا دورہ کیا۔ جہاں انہوں نے پاک افغان بارڈر پر فینسنگ کا جائزہ لیا اور پاک افغان سرحد پر دوا توئی سیکٹر میں فرائض سرانجام دینےوالےجوانوں سے ملاقات کی۔

آئی ایس پی آر کے مطابق سربراہ پاک فوج کو پاک افغان سرحد پر آپریشن کے حوالے سے بریفنگ دیتے ہوئے بتایا گیا کہ پاک افغان بارڈر پر آپریشن کے دوران 90 بارودی سرنگوں کو تباہ کیا گیا۔ بارڈر پر حالیہ کاروائیوں سے دہشت گردوں کے ٹھکانے ختم کیے گئے ہیں۔ جنرل باجوہ نے بارڈر پر تعینات جوانوں کے حوصلہ اور جرات کی تعریف کی۔ انہوں نے اس موقع پر اظہار خیال کرتے ہوئے کہا کہ پاکستان بارڈر کی سیکیورٹی بہتر بنانے کے لیے مؤثر کردار ادا کر رہا ہے ۔ پاکستان نےپاک افغان سرحدپرایف سی اورقانون نافذکرنےوالےاداروں کی صلاحیتوں کوبہتر بنایاہے۔

آرمی چیف نے میران شاہ کا دورہ بھی کیا جہاں جوانوں سے خطاب میں انہوں نے قبائلی عوام کا دہشت گردی کے خلاف لڑائی میں تعاون کا خیرمقدم کیا ۔ جنرل باجوہ نے کہا کہ قبائلی عوام نے انسداد دہشت گردی کے لیے بہت قربانیاں دیںِ ۔ خطے میں بڑی حد تک امن قائم ہوچکا ہے ہم دیرپا امن کے لیے پرعزم ہیں۔

آرمی چیف نے کہا کہ آپریشن ردالفساد میں حاصل ہونے والی کامیابیوں کے خلاف عزائم کے خلاف چوکنا رہنا ہوگا ۔ عدم استحکام پھیلانے والے عناصر کے ساتھ سختی سے نمٹیں گے۔

شمالی وزیرستان آمد پر کور کمانڈر پشاور لیفٹیننٹ جنرل نعمان محمود نے آرمی چیف کا استقبال کیا ۔۔۔آرمی چیف جنرل قمر جاوید باجوہ نے میران شاہ کا بھی دورہ کیا۔