وقت سے پہلے آرمی چیف کی تقرری میں کوئی حرج نہیں،عمران خان سے واٹس اپ پر رابطہ ہوتا ہے، صدر مملک عارف علوی

خلیج اردو

اسلام آباد: موجودہ سیاسی کشیدگی کم کرنے کیلئے صدر مملکت ڈاکٹر عارف علوی نے کردار ادا کرنے کی پیشکش کردی ۔ سینئر صحافیوں سے ملاقات میں گفتگو کرتے ہوئے صدر نے کہاکہ بطور صدر میرے پاس یہ اختیار نہیں کہ کسی کو کہوں کہ ڈائیلاگ کرو

صدرعارف علوی سے سینئر صحافیوں کی ملاقات کے دوران گفتگو کرتے ہوئے اس تاثر کو رد کردیا کہ ان کے وزیراعظم شہبازشریف کے ساتھ تعلقات خراب ہیں، بولے، موجودہ حکومت میں میرے پاس 74 سمریاں دستخط کے لیے آئیں جن میں سے 67 سمریاں اسی روز دستخط کرکے واپس بھیجوائیں۔

ڈاکٹرعارف علوی نے ایک اورسوال کے جواب میں کہاکہ غیرملکی خط پر اگر کوئی تحقیقات ہوئی ہیں تو انکو عوام کے سامنے لایا جائے۔

انہوں نے کہا کہ بطور صدر میرے پاس یہ اختیار نہیں کہ کسی کو کہوں کہ ڈائیلاگ کرو، تمام فریق راضی ہوں تو ایوان صدر کردار ادا کرنے کو تیار ہے۔

صدر مملکت نے ایک سوال کے جواب میں کہامیں نے نہ آئین توڑا ہے نہ غداری کی ہے، جس نے غداری کی ہے اس پر آرٹیکل 6 ضرور لگائیں، ذاتی حیثیت میں سمجھتا ہوں کہ کلیئر مینڈیٹ بہت ضروری ہے۔

عارف علوی نے ایک سوال پر کہاکہ آرمی چیف کی تقرری وقت سے پہلے کرنے میں کوئی حرج نہیں۔ ملک میں فوج کا آئینی کردار نہیں ہوتا۔

عارف علوی نے بتایا کہ بلاول بھٹوزرداری نے امریکہ سے تعلقات بہتر بنانے کی کاوش کی ہے کہاکہ عمران خان سے وٹس ایپ پر بات ہوتی ہے ان سے آخری بات پنجاب کے گورنر کے معاملے پر ہوئی تھی۔

صدر نے کسی قانون سے متعلق عمران خان سے گفتگو کی تردید کرتے ہوئے کہا کہ عمران خان سے الیکٹرانک ووٹنگ مشین یا نیب قانون کے حوالے سے کوئی بات نہیں ہوئی۔