گزشتہ ہفتے عمان کے خلاف 1-2 سے سنسنی خیز کامیابی کے بعد کوزمین اولارویو کی ٹیم تاریخ رقم کرنے سے صرف ایک جیت کی دوری پر ہے۔ یو اے ای اس سے قبل صرف ایک بار 1990 میں ورلڈ کپ کھیل چکا ہے، اور اب دوحہ کے جاسم بن حمد اسٹیڈیم میں ایک نئی تاریخ رقم کرنے کا موقع موجود ہے۔
ہیڈ کوچ کوزمین اولارویو نے کہا، ’’یہی وہ لمحہ ہے — یہ ایک آخری جنگ ہے، ہمیں اسے فائنل کے طور پر کھیلنا ہے، اور ہمیں امید ہے کہ ہم یہ خواب یو اے ای کے لیے حقیقت بنا سکیں گے۔‘‘
اگرچہ میچ کی اہمیت بہت زیادہ ہے، لیکن یو اے ای کے شائقین کے لیے اسٹیڈیم کی صرف 8 فیصد نشستیں مختص کی گئی ہیں، جس پر شائقین نے مایوسی کا اظہار کیا ہے۔
اولارویو نے کہا، ’’یہ افسوس کی بات ہے کہ ہمارے بہت سے شائقین وہاں نہیں ہو سکیں گے۔ آٹھ فیصد بہت کم ہے، خاص طور پر جب یہ کوالیفائنگ میچ ہے، نہ کہ کوئی ایوے لیگ گیم۔ لیکن جو شائقین ہمارے ساتھ ہیں، وہ ہمیں بھرپور توانائی دیتے ہیں، جیسے پچھلے میچ میں دیا۔ ہم ہر صورتحال سے نمٹنے کے لیے تیار ہیں۔‘‘
عمان کے خلاف میچ میں اولارویو کی حکمتِ عملی فیصلہ کن ثابت ہوئی، جب متبادل کھلاڑی کائیو کینیڈو، یحییٰ نادر اور حارب عبداللہ نے شاندار کارکردگی دکھائی۔ امکان ہے کہ رومانیہ سے تعلق رکھنے والے کوچ قطر کے خلاف میچ میں بھی اپنی ابتدائی ٹیم میں اہم تبدیلیاں کر سکتے ہیں تاکہ حریف کو حکمتِ عملی سے شکست دی جا سکے۔
