خلیج اردو
بیجنگ: چین نے امریکہ کی جانب سے عائد کی گئی نئی تجارتی پابندیوں اور محصولات کو سختی سے مسترد کرتے ہوئے واضح کیا ہے کہ وہ اپنے قانونی حقوق اور مفادات کے تحفظ کے لیے تمام ضروری اقدامات کرے گا۔
چینی وزارت خارجہ کے ترجمان لن جیان نے ایک بیان میں کہا کہ “چین امریکہ کی حالیہ پابندیوں کو مکمل طور پر مسترد کرتا ہے اور اپنے جائز مفادات کے دفاع کے لیے ضروری اقدامات کرے گا۔”
انہوں نے کہا کہ “اعلیٰ ٹیرف کی دھمکی دینا چین سے معاملات طے کرنے کا درست طریقہ نہیں۔ امریکہ کو چاہیے کہ وہ اپنا رویہ درست کرے اور دونوں ممالک کے صدور کے درمیان ہونے والی بات چیت کی روشنی میں باہمی سمجھوتوں پر عمل کرے۔”
لن جیان نے مزید کہا کہ دونوں ممالک کو برابری، احترام اور باہمی مفاد کی بنیاد پر اختلافات کو مذاکرات کے ذریعے حل کرنا چاہیے تاکہ تعلقات کو مستحکم، متوازن اور پائیدار راستے پر گامزن رکھا جا سکے۔
بیان اس وقت سامنے آیا ہے جب امریکی صدر ڈونلڈ ٹرمپ نے چین کے صدر شی جن پنگ کے بارے میں مثبت ریمارکس دیتے ہوئے کہا کہ “صدر شی انتہائی قابل احترام رہنما ہیں، اور میں پُرامید ہوں کہ دونوں ممالک کے درمیان تعلقات بہتر ہوں گے۔”
چینی وزارت تجارت کے ترجمان نے بھی ردعمل دیتے ہوئے کہا کہ “اعلیٰ ٹیرف کی دھمکیاں چین سے بات کرنے کا مناسب طریقہ نہیں۔ اگر امریکہ یکطرفہ اقدامات پر اصرار کرتا ہے تو چین اپنے مفادات کے تحفظ کے لیے مؤثر جوابی اقدامات کرے گا۔ ہم تجارتی جنگ نہیں چاہتے لیکن اس سے خوفزدہ بھی نہیں ہیں۔”
ماہرین کے مطابق دنیا کی دو بڑی معیشتوں کے درمیان بڑھتی ہوئی کشیدگی نے عالمی منڈیوں میں بے یقینی کی فضا پیدا کر دی ہے، اور سرمایہ کاروں میں خدشات بڑھ گئے ہیں کہ اگر صورتحال برقرار رہی تو رواں سال کے آغاز جیسی تجارتی جنگ دوبارہ شروع ہو سکتی ہے۔
