خلیج اردو
دبئی: روڈز اینڈ ٹرانسپورٹ اتھارٹی (آر ٹی اے) نے اعلان کیا ہے کہ دبئی رائیڈ 2025 کے موقع پر اتوار، 2 نومبر کو دبئی میٹرو کے اوقات میں توسیع کی جائے گی تاکہ شہریوں اور شرکاء کو آسانی سے سفر کی سہولت فراہم کی جا سکے۔
دبئی رائیڈ، جو شیخ زاید روڈ پر منعقد ہوتی ہے، دبئی فٹنس چیلنج کے نمایاں ایونٹس میں سے ایک اور شہر کا سب سے بڑا سائیکلنگ ایونٹ ہے۔ آر ٹی اے کے مطابق میٹرو صبح 3 بجے سے رات 12 بجے تک مسلسل چلتی رہے گی تاکہ شرکاء اور ناظمین کو بلا تعطل آمدورفت میسر ہو۔
اتھارٹی نے اپنے سوشل میڈیا پلیٹ فارمز پر پیغام میں کہا کہ ’’دبئی میٹرو کے اوقات اتوار، 2 نومبر 2025 کو صبح 3 بجے سے رات 12 بجے تک ہوں گے تاکہ دبئی رائیڈ میں شرکت کرنے والوں کے سفر کو آسان بنایا جا سکے۔‘‘
سڑکوں کی بندش کے حوالے سے آر ٹی اے نے بتایا کہ اتوار کی صبح 3 بجے سے 10 بجے تک بعض اہم شاہراہیں عارضی طور پر بند رہیں گی تاکہ سائیکل سواروں کی حفاظت یقینی بنائی جا سکے۔ بند ہونے والی سڑکوں میں شامل ہیں:
* شیخ زاید روڈ (ٹریڈ سینٹر راونڈ اباؤٹ سے الہدیقہ برج تک)
* لوئر فنانشل سینٹر اسٹریٹ (شیخ زاید روڈ سے الخیل روڈ تک)
* شیخ محمد بن راشد بولیوارڈ کا ایک طرفہ حصہ
آر ٹی اے نے متبادل راستوں کی بھی نشاندہی کی ہے جن میں اپر فنانشل سینٹر اسٹریٹ، زعبیل پیلس روڈ، الوصل روڈ، الخیل روڈ اور العسیل روڈ شامل ہیں۔
اتھارٹی نے شہریوں سے درخواست کی کہ وہ پیشگی منصوبہ بندی کریں اور تجویز کردہ راستوں پر سفر کریں تاکہ تاخیر سے بچا جا سکے۔
سالک کمپنی نے بھی دبئی رائیڈ کے موقع پر ٹول چارجز میں عارضی تبدیلی کا اعلان کیا ہے۔ اتوار کو صبح 6 بجے سے 10 بجے تک فیس 4 درہم سے بڑھا کر 6 درہم کر دی گئی ہے، جبکہ صبح 1 بجے سے 6 بجے کے درمیان فیس معاف رہے گی۔
گزشتہ سال دبئی رائیڈ میں 37,130 سے زائد افراد نے شرکت کی تھی، اور رواں سال اس سے بھی زیادہ شرکت کی توقع کی جا رہی ہے۔ یہ ایونٹ دبئی کے صحت مند، متحرک اور خوشحال طرزِ زندگی کے عزم کی عکاسی کرتا ہے۔
