خلیج اردو
ابوظبی: متحدہ عرب امارات کے سرکاری اسکولوں نے 2025-2026 کے تعلیمی سال کے پہلے سمسٹر کے اختتامی امتحانات کی تیاری کے سلسلے میں اعلان کیا ہے کہ 10 سے 19 نومبر کے دوران طلبہ کی غیر حاضری کو دوہرا شمار کیا جائے گا۔ یہ اقدام وزارت تعلیم کی حاضری و غیر حاضری سے متعلق پالیسی گائیڈ لائن کے مطابق کیا گیا ہے۔
پالیسی کے تحت کسی بھی غیر مجاز غیر حاضری کے ایک دن کو دو دن کے برابر شمار کیا جائے گا، جس سے طلبہ کی تعلیمی کارکردگی اور پاسنگ کی اہلیت متاثر ہو سکتی ہے۔
ماضی میں یہ اصول صرف جمعے کے روز لاگو ہوتا تھا، مگر اس بار امتحانات سے قبل پورے ہفتے کے دوران اس کا اطلاق کیا جائے گا تاکہ نظم و ضبط اور تعلیمی تیاری کو یقینی بنایا جا سکے۔
پہلے سمسٹر کے مرکزی امتحانات 20 نومبر سے 4 دسمبر تک ہوں گے۔ یومِ اتحاد کی تعطیلات کے پیش نظر طلبہ 27 نومبر تک امتحانات دیں گے، جس کے بعد انہیں چھ دن کی چھٹی (ہفتہ وار تعطیل سمیت) دی جائے گی، اور 4 دسمبر کو امتحانات دوبارہ شروع ہوں گے۔
اس دوران اسکولوں نے طلبہ کی روزانہ حاضری کو لازمی قرار دیتے ہوئے کہا ہے کہ مختلف تعلیمی اور تخلیقی پروگرام بھی متعارف کرائے جا رہے ہیں جن میں “ٹوگیدر ود دی اسٹرکچر”، “سکسیس انیشی ایٹو” اور “ڈیجیٹل ایمپاورمنٹ انیشی ایٹو” شامل ہیں۔ ان اقدامات کا مقصد طلبہ میں خود سیکھنے، تخلیقی صلاحیت اور جدت کو فروغ دینا ہے تاکہ ایک نظم و ضبط یافتہ، مستقبل کے لیے تیار نسل تیار کی جا سکے۔
امتحانات سے قبل اسکولوں نے طلبہ اور والدین کو مشورہ دیا ہے کہ آن لائن امتحانات کے لیے استعمال ہونے والے برقی آلات کی جانچ کر لیں اور کسی خرابی کی صورت میں انہیں اسکول کے تکنیکی شعبے کے حوالے کریں۔ اسکولوں نے واضح کیا ہے کہ ٹوٹے ہوئے اسکرین، خراب ڈیوائس یا ضائع شدہ چارجر کی مرمت یا تبدیلی کے اخراجات والدین کو برداشت کرنا ہوں گے۔
