خلیج اردو
جمعرات کی علی الصبح متحدہ عرب امارات کے متعدد علاقوں میں گھنے اور غیر معمولی دھند نے زندگی کی رفتار سست کر دی، جبکہ کئی مقامات پر حدِ نگاہ 500 میٹر سے بھی کم رہی۔ نیشنل سینٹر آف میٹروالوجی نے دبئی، ابوظبی، شارجہ اور عجمان میں آدھی رات کے فوراً بعد ریڈ الرٹ جاری کر دیا، کیونکہ حدِ نگاہ تیزی سے کم ہو رہی تھی۔
دبئی کے مختلف علاقوں خصوصاً القصیص، المحیصنہ اور شیخ محمد بن زاید روڈ کے اطراف صبح سویرے دھند کا شدید دباؤ رہا، جہاں حدِ نگاہ 100 میٹر سے بھی نیچے چلی گئی۔ نتیجتاً دفاتر کے اوقات میں ٹریفک رینگتے ہوئے آگے بڑھتی رہی۔
شارجہ سے آنے والے مقیم احمد خان نے بتایا کہ روانگی کے وقت دھند نہیں تھی، مگر القصیص پہنچتے ہی گھنی دھند نے ڈرائیونگ مشکل بنا دی۔ انہوں نے کہا کہ 70 کلومیٹر فی گھنٹہ کی مقرر رفتار کے بجائے انہیں صرف 30 کلومیٹر فی گھنٹہ کی رفتار سے گاڑی چلانا پڑی، جس کے باعث بہت سے لوگ دفاتر دیر سے پہنچیں گے۔
الکوظ میں بچوں کو اسکول چھوڑنے والے حنیف اے نے بھی حدِ نگاہ 100 میٹر سے کم ہونے کی تصدیق کی اور کہا کہ کچھ ڈرائیور غلطی سے ہیزرڈ لائٹس استعمال کر رہے تھے جبکہ حکام بارہا اسے خطرناک قرار دے چکے ہیں، کیونکہ اس سے سگنل لائٹس واضح نہیں ہوتیں اور حادثات کا خدشہ بڑھ جاتا ہے۔
ابوظبی پولیس نے موسم کی خرابی کے باعث اسپیڈ لمٹس کم کر کے 80 کلومیٹر فی گھنٹہ کر دیں اور ڈرائیورز کے فونز پر ایمرجنسی الرٹس بھی جاری کیے۔ دبئی پولیس نے بھی شہریوں کو زیادہ سے زیادہ احتیاط برتنے اور رفتار کم رکھنے کی ہدایت کی، جبکہ شارجہ پولیس نے مناسب فاصلہ برقرار رکھنے اور محتاط ڈرائیونگ پر زور دیا۔
دبئی کی روڈز اینڈ ٹرانسپورٹ اتھارٹی نے شہریوں سے اپیل کی کہ دھند میں دھیمی رفتار اختیار کریں، فوگ لائٹس اور انڈی کیٹر کا استعمال یقینی بنائیں، اور اچانک سمت تبدیل کرنے سے گریز کریں۔ این سی ایم نے بھی ڈرائیورز کو سڑک کے حالات کے مطابق احتیاطی تدابیر اپنانے کی یاد دہانی کرائی۔
حکام نے متنبہ کیا ہے کہ شہری موسم کی تازہ ترین معلومات سے باخبر رہیں، سفر کے لیے زیادہ وقت رکھیں اور حدِ نگاہ بہتر ہونے تک انتہائی احتیاط کے ساتھ ڈرائیونگ کریں۔
