خلیج اردو
پاکستان میں اوپن مارکیٹ میں امریکی ڈالر کی قلت برقرار ہے، جس کے باعث مسافروں اور بیرون ملک تعلیم حاصل کرنے والے طلبہ کو شدید مشکلات کا سامنا کرنا پڑ رہا ہے۔ مختلف شہروں میں قائم کرنسی ایکسچینج ڈیلرز کے مطابق بیشتر ایکسچینج کمپنیاں صرف اتنے ہی ڈالر فروخت کر رہی ہیں جتنے وہ خود خرید پاتی ہیں، جبکہ بعض نے فروخت مکمل طور پر روک دی ہے اور کچھ مقامات پر فی کس صرف 100 ڈالر تک کی حد مقرر کر دی گئی ہے۔ رپورٹ کے مطابق چند ایکسچینج کمپنیوں کے پاس پرانے ڈیزائن کے ڈالر نوٹس دستیاب ہیں جو بین الاقوامی سفر کے لیے موزوں نہیں سمجھے جاتے۔
ڈالر کی کمی کے باعث مسافروں کو غیر موزوں اور مہنگے نرخوں پر غیر ملکی کرنسی خریدنے پر مجبور ہونا پڑ رہا ہے، جبکہ بیرون ملک تعلیم کے لیے رقوم بھیجنے والے طلبہ اور ان کے اہل خانہ بھی شدید متاثر ہیں۔ لاہور کے ایک رہائشی نے بتایا کہ اس نے اپنے بہن بھائی کی فیس کے لیے ڈالر خریدنے کی غرض سے 11 ایکسچینج کمپنیوں سے رجوع کیا، مگر کہیں سے بھی ڈالر دستیاب نہ ہو سکے۔
ماہرین اس بحران کی وجہ کرنسی ایکسچینج کے لیے متعارف کرائے گئے نئے اسٹینڈرڈ آپریٹنگ پروسیجرز کو قرار دے رہے ہیں، جن میں بایومیٹرک تصدیق، اصل شناختی کارڈ اور بعض لین دین کے لیے فیشل ریکگنیشن شامل ہے۔ اس کے علاوہ اسٹیٹ بینک آف پاکستان کی حالیہ ہدایت کے تحت ڈالر کی خریداری کے لیے چیک کے ذریعے رقم غیر ملکی کرنسی اکاؤنٹ میں جمع کرانا لازمی قرار دیا گیا ہے، جس سے عوام کے لیے رسائی مزید مشکل ہو گئی ہے۔
ایکسچینج کمپنیز ایسوسی ایشن آف پاکستان کے چیئرمین ملک بوستان نے ڈالر کی طلب اور رسد میں واضح فرق کو تسلیم کرتے ہوئے کہا ہے کہ ایکسچینج کمپنیوں کو صارفین کا مکمل ریکارڈ رکھنا ہوگا اور جب ڈالر دستیاب نہ ہوں تو حصول کے لیے معاونت فراہم کرنا ہوگی۔
رپورٹ کے مطابق فزیکل ایکسچینج مارکیٹ میں قلت کے باوجود ڈالر سے منسلک ڈیجیٹل کرنسیوں کا استعمال بڑھ رہا ہے، تاہم بینکوں کو اس وقت تک ایسے لین دین کی اجازت نہیں جب تک پاکستان ورچوئل اثاثہ جات ریگولیٹری اتھارٹی کی جانب سے باقاعدہ فریم ورک جاری نہیں کیا جاتا۔ ملک بوستان نے خبردار کیا کہ اگر صورتحال برقرار رہی تو غیر قانونی سرگرمیاں غیر منظم کرپٹو پلیٹ فارمز کی جانب منتقل ہو سکتی ہیں، جہاں اسمگلنگ میں کمی کے باوجود ذخیرہ اندوزی ایک نیا مسئلہ بنتی جا رہی ہے۔
