العین عدالت کا طالبہ کے سرپرست کو واجب الادا اسکول فیس اور ہرجانہ ادا کرنے کا حکم

خلیج اردو
متحدہ عرب امارات کی العین سول، کمرشل اور انتظامی مقدمات کی عدالت نے نجی اسکول کی جانب سے دائر دعویٰ پر فیصلہ سناتے ہوئے طالبہ کے سرپرست کو واجب الادا فیس اور ہرجانے کی ادائیگی کا حکم دے دیا۔

مکمل خبر
العین: العین سول، کمرشل اور انتظامی مقدمات کی عدالت نے ایک طالبہ کے سرپرست کو ہدایت کی ہے کہ وہ اپنی بیٹی کے نجی اسکول کو گزشتہ تعلیمی سال کی واجب الادا فیس کی مد میں 4,669 درہم ادا کرے، جبکہ اضافی طور پر 500 درہم بطور ہرجانہ بھی ادا کیے جائیں۔ عدالت نے قرار دیا کہ سرپرست گزشتہ تعلیمی سال کی فیس ادا کرنے میں ناکام رہا۔

عدالتی ریکارڈ کے مطابق نجی اسکول نے 2024 تا 2025 کے تعلیمی سال کی بقایا فیس کی وصولی کے لیے مقدمہ دائر کیا تھا۔ اسکول انتظامیہ نے مؤقف اختیار کیا کہ سرپرست کو بارہا ادائیگی کے لیے یاد دہانی کرائی گئی، تاہم فیس ادا نہیں کی گئی۔ اسکول نے بقایا رقم کے علاوہ 4 ہزار درہم ہرجانہ، قانونی سود، عدالتی اخراجات اور وکلا کی فیس کا بھی مطالبہ کیا تھا۔

سرپرست نے عدالت میں دعویٰ مسترد کرنے کی درخواست دائر کی اور مؤقف اپنایا کہ اسکول کا دعویٰ درست اور ثابت شدہ نہیں ہے۔ تاہم عدالت نے اسکول کی جانب سے پیش کردہ دستاویزات کا جائزہ لیا، جن میں فیس کی بقایا قسطوں سے متعلق اکاؤنٹ اسٹیٹمنٹ بھی شامل تھی۔

عدالت نے فیصلہ دیا کہ سرپرست فیس کی ادائیگی ثابت کرنے میں ناکام رہا اور قانون کے مطابق قرض کی ادائیگی ثابت کرنے کی ذمہ داری مقروض پر عائد ہوتی ہے۔ اسی بنیاد پر عدالت نے سرپرست کو بقایا فیس اور ہرجانے کی ادائیگی کا حکم جاری کیا۔