خلیج اردو:
دبئی: متحدہ عرب امارات میں آئندہ چند روز کے دوران موسم متغیر رہنے کا امکان ہے، بعض علاقوں میں گرد آلود اور دھندلا ماحول، بدلتے ہوئے بادل اور وقفے وقفے سے ہلکی بارش متوقع ہے، نیشنل سینٹر آف میٹیورولوجی کے مطابق مختلف حصوں میں موسم میں تبدیلیاں دیکھنے کو ملیں گی۔
محکمہ موسمیات کا کہنا ہے کہ ملک کے کئی علاقوں میں موسم صاف سے جزوی طور پر ابر آلود رہ سکتا ہے جبکہ کہیں کہیں گرد و غبار اور دھند کے باعث حدِ نگاہ متاثر ہونے کا خدشہ ہے۔ ساحلی اور سمندری علاقوں میں ہوا کی رفتار میں اضافہ ہوسکتا ہے جبکہ ہلکی بارش کا امکان بھی برقرار رہے گا۔
آج اور جمعرات کی صبح تک بعض مغربی اندرونی اور ساحلی علاقوں میں نمی کے باعث دھند یا کہر پڑنے کا خطرہ موجود رہے گا۔ آسمان جزوی طور پر ابر آلود رہ سکتا ہے اور کم اونچائی والے بادل ساحلی علاقوں اور سمندر کے اوپر نمودار ہوسکتے ہیں۔
جمعہ کی صبح بھی اسی طرح کے حالات برقرار رہنے کا امکان ہے، مغربی علاقوں میں نمی کی شرح بڑھنے سے دھند یا کہر بننے کے امکانات میں اضافہ ہوگا۔ درجہ حرارت میں معمولی کمی خصوصاً شمالی علاقوں میں متوقع ہے جبکہ ہوائیں ہلکی سے معتدل رفتار کی رہیں گی۔
ہفتہ کے روز بھی مجموعی طور پر موسم اسی نوعیت کا رہنے کا امکان ہے، کہیں کہیں گرد آلود ماحول، جزوی طور پر ابر آلود آسمان اور صبح کے وقت نمی برقرار رہے گی۔ کسی بھی ممکنہ بارش کو ہلکا اور مقامی نوعیت کا قرار دیا گیا ہے۔
عرب خلیج میں سمندر کی صورت حال ہلکی سے معتدل جبکہ بحیرہ عمان میں ہلکی رہے گی، ہوائیں عموماً ہلکی سے معتدل مگر وقفے وقفے سے تیز ہونے کا امکان ہے۔
رہائشیوں اور موٹر سواروں کو مشورہ دیا گیا ہے کہ صبح کے اوقات میں حدِ نگاہ کم ہونے کے باعث سفر کے دوران احتیاطی تدابیر اختیار کریں کیونکہ دھند اور گرد و غبار بعض علاقوں میں سڑکوں پر آمد و رفت کو متاثر کرسکتے ہیں۔
