خلیج اردو
دبئی کی شاہراہ E311 پر دبئی سلیکون اویسس کے قریب پیش آنے والے ٹریفک حادثے میں ایک بھارتی موٹر سائیکل سوار شدید زخمی ہو گیا، جس کے بعد اسے تقریباً چار لاکھ درہم کے اسپتال بل کا سامنا ہے۔
متاثرہ شخص 36 سالہ اویناش سیکیرا ہے جو فکیہ یونیورسٹی اسپتال میں زیرِ علاج ہے، جہاں اس کے اب تک دو بڑے آپریشن ہو چکے ہیں جبکہ مزید سرجریز متوقع ہیں۔
خاندان کے مطابق اویناش اتوار کی صبح ساتھی بائیکرز کے ساتھ حتہ کی جانب معمول کی گروپ رائیڈ پر نکلا تھا۔ اس کی اپنی موٹر سائیکل مرمت میں تھی، جس کے باعث اس نے دوست کی بائیک استعمال کی۔ اویناش ڈوکاٹی اونرز کلب کا رکن بھی ہے اور باقاعدگی سے ویک اینڈ پر رائیڈنگ کرتا ہے۔
واپسی کے دوران لیوان کے قریب ایک موٹر سائیکل کے ریڈی ایٹر میں لیکیج سامنے آئی، جس پر گروپ نے بائیکس تبدیل کیں تاکہ خراب موٹر سائیکل کو گیراج پہنچایا جا سکے۔ اسی دوران اویناش دوسری بائیک پر گھر کی جانب روانہ ہوا۔
اویناش کے مطابق، "سب کچھ ٹھیک تھا، لیکن پل پر ہلکے موڑ پر اچانک بائیک پھسل گئی، میں تیز رفتاری میں نہیں تھا، رفتار پچاس کلومیٹر فی گھنٹہ سے بھی کم تھی۔”
حادثے کے نتیجے میں اویناش کی دونوں ٹانگوں اور دائیں کولہے میں متعدد فریکچر ہوئے۔ راہگیروں نے فوری طور پر ایمرجنسی سروسز کو اطلاع دی، جس کے بعد ایمبولینس کے ذریعے اسے اسپتال منتقل کیا گیا۔
ڈاکٹروں نے بتایا کہ تقریباً پانچ گھنٹے طویل سرجری کے دوران فریکچر کو سہارا دینے کے لیے اسٹیل راڈز لگائے گئے ہیں، جبکہ بائیں ٹانگ اور دائیں پنڈلی کی مزید سرجریز باقی ہیں۔
اویناش فری لانس ایونٹس مینجمنٹ کے شعبے سے وابستہ ہے اور اس کے پاس میڈیکل انشورنس موجود نہیں۔ اس کے والد 65 سالہ سنیل سیکیرا کے مطابق خاندان کے لیے علاج کے اخراجات برداشت کرنا ممکن نہیں۔
والد کا کہنا ہے، "حادثے کے بعد اویناش کے آئی فون نے خودکار ایس او ایس الرٹ بھیجا، ہم اسپتال پہنچے تو وہ پہلے ہی آپریشن کی تیاری میں تھا۔”
ڈاکٹروں کے مطابق اویناش کو چلنے کے قابل ہونے کے لیے کم از کم تین ماہ کی بحالی درکار ہوگی جبکہ مکمل صحتیابی میں مزید کئی ماہ لگ سکتے ہیں۔
