خلیج اردو
دبئی کی قومی ایئرلائن ایمریٹس نے اگلے پانچ سال کے دوران 20 ہزار نئے ملازمین بھرتی کرنے کا اعلان کیا ہے۔ یہ بھرتیاں نئے طیاروں کی شمولیت اور نئے و موجودہ روٹس پر پروازوں کی تعداد بڑھانے کے پیشِ نظر کی جائیں گی۔
ایمریٹس کے ڈپٹی پریذیڈنٹ اور چیف آپریشنز آفیسر عادل الرضا کے مطابق، "اب سے دہائی کے اختتام تک ہمیں تقریباً 20 ہزار آپریشنل اسٹاف درکار ہوگا، جن میں کیبن کریو، پائلٹس، انجینئرز، ٹیکنیشنز اور ایئرپورٹ اسٹاف شامل ہیں۔”
عادل الرضا نے بتایا کہ ایمریٹس گروپ نے 2025-26 کے مالی سال کی پہلی ششماہی میں "بہت اچھی کارکردگی” کا مظاہرہ کیا ہے۔ ان کے مطابق، "دبئی سے اور دبئی کے لیے تمام روٹس پر سفری طلب مسلسل بلند ہے، اسی طلب کے باعث ہم فضاء اور زمین دونوں پر مزید سرمایہ کاری کر رہے ہیں۔”
واضح رہے کہ ایمریٹس گروپ کے ملازمین کی تعداد 2024-25 کے مالی سال کے اختتام پر ایک لاکھ 24 ہزار تھی۔
تجزیہ کاروں کے مطابق ایمریٹس کی جانب سے بڑے پیمانے پر بھرتیوں کا اعلان دبئی کے ایوی ایشن سیکٹر کی مضبوط بحالی اور مستقبل میں مزید توسیع کی واضح علامت ہے۔
