خلیج اردو
متحدہ عرب امارات میں جاری علاقائی کشیدگی کے دوران شہریوں کو تفریحی مواقع فراہم کرنے کے لیے دبئی میراکل گارڈن نے اماراتی رہائشیوں کے لیے محدود مدت تک مفت داخلے کا اعلان کر دیا ہے۔
حکام کے مطابق پندرہ مارچ سے اکتیس مارچ تک متحدہ عرب امارات کے رہائشی صرف اپنا امارات آئی ڈی دکھا کر اس مشہور سیاحتی مقام میں بغیر کسی فیس کے داخل ہو سکیں گے۔ یہ سہولت صرف اماراتی رہائشیوں کے لیے مخصوص ہوگی۔
انتظامیہ کے مطابق اس مدت کے دوران باغ روزانہ صبح نو بجے سے رات نو بجے تک کھلا رہے گا اور داخلے کے لیے کسی پیشگی بکنگ کی ضرورت نہیں ہوگی۔ حکام کا کہنا ہے کہ اس اقدام کا مقصد موجودہ علاقائی حالات کے دوران شہریوں اور خاندانوں کو ذہنی سکون اور تفریح کا موقع فراہم کرنا ہے۔
دبئی میراکل گارڈن دنیا کے سب سے بڑے قدرتی پھولوں کے باغات میں شمار ہوتا ہے جہاں لاکھوں تازہ پھولوں سے بنے بڑے مجسمے، تھیم ڈسپلے اور دلکش تنصیبات سیاحوں کی توجہ کا مرکز بنتی ہیں۔ یہ باغ دبئی کے علاقے ارجان، البرشا ساؤتھ تھری میں واقع ہے۔
ادھر دبئی کے معروف ریزورٹ اٹلانٹس دی پام نے بھی اپنے دو بڑے تفریحی مقامات ایکواوینچر ورلڈ اور لاسٹ چیمبرز ایکویریم میں دس سے بائیس مارچ تک مفت داخلے کی پیشکش کی ہے۔
ماہرین کے مطابق ایسے اقدامات کا مقصد موجودہ علاقائی کشیدگی کے دوران شہریوں کو مثبت سرگرمیوں کی طرف راغب کرنا اور خاندانوں کو تفریح کے مواقع فراہم کرنا ہے۔
