خلیج اردو
جنوبی اسرائیل کے شہروں اراد اور دیمونا پر ایرانی میزائل حملوں کے نتیجے میں 100 سے زائد افراد زخمی ہو گئے۔ امدادی ذرائع کے مطابق اراد میں 75 جبکہ دیمونا میں 33 افراد زخمی ہوئے، جن میں متعدد کی حالت تشویشناک ہے۔
رپورٹس کے مطابق میزائل حملوں کے دوران اسرائیلی فضائی دفاعی نظام اہداف کو روکنے میں ناکام رہا، جس کے باعث میزائل براہِ راست رہائشی عمارتوں سے ٹکرا گئے۔ دھماکوں سے عمارتوں کے اگلے حصے تباہ ہو گئے اور زمین میں بڑے گڑھے پڑ گئے۔
عینی شاہدین کے مطابق جائے وقوعہ پر شدید تباہی اور افراتفری دیکھنے میں آئی۔ ریسکیو اہلکار ملبے تلے دبے افراد کو نکالنے میں مصروف رہے جبکہ فائر بریگیڈ نے آگ پر قابو پایا۔ حکام کے مطابق اراد میں تین عمارتوں کو شدید نقصان پہنچا اور ایک میں آگ بھڑک اٹھی۔
ایرانی سرکاری میڈیا کا کہنا ہے کہ دیمونا پر حملہ اس کے جوہری مرکز نطنز جوہری تنصیب پر پہلے کیے گئے حملے کا جواب ہے۔ دیمونا کو اسرائیل کے حساس جوہری مقام کے طور پر دیکھا جاتا ہے، اگرچہ اسرائیل نے کبھی باضابطہ طور پر جوہری ہتھیار رکھنے کا اعتراف نہیں کیا۔
اسرائیلی فوج کے ترجمان نے بیان میں کہا کہ "فضائی دفاعی نظام نے کام کیا مگر میزائل کو روکنے میں ناکام رہا، واقعے کی تحقیقات کی جائیں گی”۔ دوسری جانب وزیراعظم بنیامین نیتن یاہو نے حملوں کے بعد ایران اور اس کے اتحادیوں کے خلاف کارروائیاں جاری رکھنے کے عزم کا اظہار کیا۔
یہ حملے ایسے وقت میں ہوئے ہیں جب ایران اور اسرائیل کے درمیان کشیدگی مسلسل بڑھ رہی ہے، اور ماہرین کے مطابق خطے میں بڑے تصادم کا خطرہ مزید بڑھ گیا ہے۔
