متحدہ عرب امارات نے منی لانڈرنگ کیس میں مطلوب ایک مفرور شخص کی گرفتاری اور حوالگی میں کویت کی مدد کی ہے، جسے بین الاقوامی پولیس انٹرپول اور دونوں ممالک کی سکیورٹی ایجنسیوں کے تعاون سے گرفتار کیا گیا۔

خلیج اردو
یہ کارروائی کویت اور متحدہ عرب امارات کے درمیان مشترکہ سکیورٹی تعاون اور انٹرپول کویت و انٹرپول ابوظہبی کے درمیان براہِ راست رابطے کے تحت کی گئی۔ مفرور شخص کی حوالگی دبئی میں کریمنل سکیورٹی آفس کی نگرانی میں عمل میں آئی۔

حکام کے مطابق گرفتار شخص کا تعلق بھارتی شہری سے ہے جسے پہلے ہی 10 سال قید بامشقت اور بعد ازاں ملک بدری کی سزا سنائی جاچکی تھی، جبکہ اس کی غیر قانونی آمدن ضبط کرنے کا بھی حکم دیا گیا تھا۔

یہ کیس ایک منظم جرائم پیشہ نیٹ ورک سے جڑا ہوا ہے جو ملک میں غیر قانونی طور پر الکوحل کی تجارت میں ملوث تھا۔ تحقیقات کے مطابق اس گروہ نے حاصل ہونے والی آمدن کو پیچیدہ مالی لین دین کے ذریعے چھپانے اور منی لانڈرنگ کے لیے استعمال کیا۔

مزید انکشاف ہوا کہ اس نیٹ ورک نے 157 ایشیائی افراد کے ذریعے 254 مالی ٹرانزیکشنز مختلف لائسنس یافتہ ایکسچینج کمپنیوں کے ذریعے کیں، جن کی مجموعی مالیت 4 لاکھ 33 ہزار 745 اعشاریہ 875 کویتی دینار تھی۔

ان لین دین کو اس انداز میں تقسیم کیا گیا تاکہ مالی نگرانی کے نظام سے بچا جا سکے اور رقوم کو “خاندانی اخراجات” کے نام پر بیرون ملک منتقل کیا جا سکے۔

حکام نے کہا کہ مسلسل نگرانی اور مشترکہ کوششوں کے بعد ملزم کا سراغ لگایا گیا اور اسے گرفتار کر کے انصاف کے کٹہرے میں لانے کے لیے حوالگی کی گئی۔

کویت نے اس آپریشن پر متحدہ عرب امارات کے ساتھ سکیورٹی تعاون کو سراہتے ہوئے کہا ہے کہ دونوں ممالک منی لانڈرنگ اور منظم مالی جرائم میں ملوث افراد کے خلاف کارروائیاں جاری رکھیں گے۔