خلیج اردو
دبئی میں اسکولوں کے اطراف ٹریفک اور پارکنگ مسائل کم کرنے کیلئے نیا ڈیجیٹل پارکنگ نظام متعارف کرادیا گیا ہے، جس کے تحت والدین، طلبہ اور اسکول عملہ تیز تر سہولت اور 80 فیصد تک بچت حاصل کرسکے گا۔ نئے نظام کے ذریعے کاغذی کارروائی کم ہوگی جبکہ اجازت ناموں کی منظوری بھی فوری ممکن بنائی جائے گی۔
یہ اقدام نالج اینڈ ہیومن ڈیولپمنٹ اتھارٹی اور Parkin Company PJSC کے اشتراک سے شروع کیا گیا ہے، جس کے تحت اسکول زونز میں پارکنگ سبسکرپشن خدمات کو مکمل طور پر ڈیجیٹل بنایا جائے گا۔
نئے نظام کے مطابق دونوں اداروں کے ڈیٹا سسٹمز براہِ راست منسلک ہوں گے، جس سے اسکول پارکنگ کیلئے اہلیت کی فوری تصدیق ہوسکے گی اور دستاویزات جمع کرانے کی ضرورت ختم ہوجائے گی۔ حکام کے مطابق اس سے انتظامی تاخیر کم ہوگی اور ڈیٹا سکیورٹی بھی مزید بہتر بنائی جائے گی۔
اس سے قبل اعلان کیا گیا تھا کہ اپنی گاڑیاں استعمال کرنے والے طلبہ صرف 100 درہم ماہانہ فیس پر سیزنل پارکنگ پرمٹ حاصل کرسکیں گے۔ اس سبسکرپشن کے ذریعے طلبہ اپنے تعلیمی ادارے کے 500 میٹر کے دائرے میں زون اے، بی، سی اور ڈی کی سڑک اور پلاٹ پارکنگ استعمال کرسکیں گے۔
ڈاکٹر آمنہ المعظمی نے کہا کہ یہ شراکت داری دبئی میں تعلیم کے شعبے کیلئے اسمارٹ، آسان اور عوام دوست خدمات کی فراہمی کی جانب اہم قدم ہے۔ ان کے مطابق اس ڈیجیٹل نظام سے والدین، اساتذہ اور طلبہ کی روزمرہ زندگی مزید سہل ہوگی۔
انہوں نے مزید کہا کہ یہ منصوبہ دبئی ایجوکیشن 33 اسٹریٹیجی کے وژن کو بھی مضبوط بنائے گا، جس کا مقصد ڈیجیٹل تبدیلی، مختلف شعبوں کے درمیان تعاون اور جدید تعلیمی ماحول کو فروغ دینا ہے۔
دوسری جانب محمد عبداللہ العلی نے کہا کہ یہ شراکت داری صارفین کیلئے خدمات کو جدید ٹیکنالوجی کے ذریعے مزید آسان اور مؤثر بنانے میں اہم سنگ میل ثابت ہوگی۔
