خلیج اردو
دبئی میں ڈرائیور کے بغیر چلنے والی ٹیکسیوں کیلئے خطے کا پہلا خصوصی انشورنس فریم ورک متعارف کرادیا گیا ہے، جس کے تحت خودکار ٹیکسی فلیٹ کو ایک منظم اور جدید بیمہ نظام کے تحت کور فراہم کیا جائے گا۔
اس حوالے سے دبئی انشورنس کو باضابطہ طور پر وہ ادارہ مقرر کیا گیا ہے جو دبئی ٹیکسی کمپنی کے زیرِ انتظام خودکار ٹیکسیوں کو انشورنس فراہم کرے گا۔
کمپنی کے مطابق یہ خطے میں اپنی نوعیت کا پہلا موقع ہے کہ مکمل طور پر بغیر ڈرائیور کمرشل ٹیکسی فلیٹ کیلئے خصوصی بیمہ فریم ورک قائم کیا گیا ہو۔ یہ اعلان اس کے بعد سامنے آیا جب دبئی کی روڈز اینڈ ٹرانسپورٹ اتھارٹی نے مارچ میں اُم سقیم اور جمیرا میں خودکار ٹیکسی سروس کا آغاز کیا۔
ابتدائی مرحلے میں 100 خودکار ٹیکسیاں شامل کی گئی ہیں، جنہیں مستقبل میں بتدریج مزید علاقوں اور تعداد میں بڑھایا جائے گا۔ یہ گاڑیاں اے آئی، جدید ڈیجیٹل نقشوں اور ڈیپ لرننگ ٹیکنالوجی کی مدد سے چلتی ہیں۔
حکام کے مطابق یہ ٹیکسیاں ٹریفک سگنلز، پیدل چلنے والوں اور دیگر گاڑیوں کے ساتھ خودکار طور پر رابطہ رکھتی ہیں اور ٹریفک قوانین کی مکمل پابندی کرتی ہیں۔
دبئی انشورنس کے سی ای او نے کہا کہ یہ پیشرفت ٹرانسپورٹ کے شعبے میں تیزی سے آنے والی تبدیلیوں کی عکاس ہے اور بیمہ انڈسٹری کو بھی اسی رفتار سے جدید ہونا ہوگا۔
ان کے مطابق اس نئے فریم ورک میں اے آئی سسٹمز، سینسر ٹیکنالوجی، ریئل ٹائم ڈیٹا اور نئی ذمہ داریوں کے ماڈلز جیسے جدید خطرات کو بھی شامل کیا گیا ہے تاکہ مکمل تحفظ یقینی بنایا جا سکے۔
حکام کا کہنا ہے کہ یہ اقدام دبئی کے اسمارٹ سٹی وژن اور جدید شہری ٹرانسپورٹ کے نظام کو مزید مضبوط بنانے میں اہم کردار ادا کرے گا۔
