خلیج اردو
فلپائن ایئرلائنز کی منیلا سے ہانگ کانگ جانے والی ایک پرواز کو ٹیک آف سے قبل سیکیورٹی خدشے کے باعث روک دیا گیا۔ طیارہ رن وے کی جانب بڑھ رہا تھا کہ اس دوران مسافروں اور عملے نے ایک زور دار آواز سنی، جس پر کیبن کریو نے فوری طور پر پائلٹس کو آگاہ کر دیا۔
فلائٹ عملے کی اطلاع پر منیلا بین الاقوامی ہوائی اڈے کے کنٹرول ٹاور نے طیارے کو روکنے کی ہدایت جاری کی، جس کے بعد بم سے متعلق معیاری حفاظتی طریقہ کار نافذ کیا گیا۔ تمام مسافروں کو طیارے سے اتارا گیا، جبکہ سامان بھی نکال کر بم ڈسپوزل ٹیم نے مسافروں، سامان اور طیارے کی مکمل تلاشی لی۔
فلپائن ایئرلائنز نے بیان میں کہا کہ پرواز پی آر 300 کو سیکیورٹی خدشے کے باعث عارضی طور پر روکا گیا تھا۔ مکمل جانچ پڑتال کے بعد طیارے کو محفوظ قرار دے دیا گیا اور کسی مشتبہ چیز کی موجودگی ثابت نہیں ہوئی، جبکہ اس واقعے میں کسی شخص کو گرفتار بھی نہیں کیا گیا۔
پرواز تقریباً تین گھنٹے کی تاخیر کے بعد ہانگ کانگ کے لیے روانہ ہو گئی۔ ایئرلائن نے کہا ہے کہ تاخیر کے باعث اپنی متصل پروازیں کھونے والے مسافروں کو ضروری معاونت فراہم کی جا رہی ہے۔
