خلیج اردو
ورلڈ کپ سیمی فائنل میں ارجنٹینا کے ہاتھوں انگلینڈ کی شکست کے بعد انگلش مڈفیلڈر جوڈ بیلنگھم ایک تنازع کا مرکز بن گئے، جس کی ویڈیو سوشل میڈیا پر تیزی سے وائرل ہو رہی ہے۔

ویڈیو میں دیکھا جا سکتا ہے کہ اختتامی سیٹی کے بعد بیلنگھم پہلے ایک ارجنٹائنی کھلاڑی سے مصافحہ کرتے ہیں، جبکہ اسی دوران ارجنٹینا کے کھلاڑی فتح کا جشن منانا شروع کر دیتے ہیں۔ کچھ لمحوں بعد ویلنٹن بارکو بھی اپنے ساتھیوں کے ساتھ جشن میں شامل ہو جاتے ہیں۔

اس دوران بیلنگھم اچانک بارکو کے قریب جاتے ہیں اور ان کے سر پر ہاتھ مارتے ہیں، جس پر بارکو انہیں دھکا دیتے ہیں۔ دونوں کھلاڑیوں کے درمیان کشیدگی بڑھنے سے پہلے دیگر کھلاڑی مداخلت کر کے معاملہ ٹھنڈا کرا دیتے ہیں۔

سیمی فائنل میں 6 گول کرنے والے بیلنگھم ارجنٹینا کے خلاف مؤثر کارکردگی دکھانے میں ناکام رہے، جبکہ سوشل میڈیا پر بعض صارفین نے دعویٰ کیا کہ میچ کے دوران بارکو مسلسل انہیں اشتعال دلاتے رہے تھے، تاہم اس دعوے کی آزادانہ تصدیق نہیں ہو سکی۔

اس سے قبل میچ کے دوران بھی بیلنگھم اور ارجنٹینا کے کپتان لیونل میسی کے درمیان گرما گرم جملوں کا تبادلہ ہوا تھا۔

میچ کے بعد بیلنگھم نے وضاحت کرتے ہوئے کہا کہ میسی کے ساتھ صرف ایک فاؤل پر بات ہو رہی تھی اور اس میں کوئی ذاتی دشمنی شامل نہیں تھی۔ انہوں نے کہا کہ میسی کے خلاف کھیلنا ان کے لیے اعزاز کی بات ہے، اگرچہ شکست کا دکھ ضرور ہے۔