امریکا اور ایران نے حملے روک دیے، ٹرمپ نے مذاکرات کے لیے موقع فراہم کر دیا

خلیج اردو
واشنگٹن: امریکہ اور ایران نے باہمی حملے روکنے پر اتفاق کیا ہے، جبکہ امریکی صدر ڈونلڈ ٹرمپ نے کشیدگی کم کرنے اور سفارتی مذاکرات کو آگے بڑھانے کے لیے فریقین کو موقع دینے کا فیصلہ کیا ہے۔

ادھر امریکہ میں وسط مدتی (مڈ ٹرم) انتخابات میں صرف 100 دن باقی رہ گئے ہیں اور صدر ٹرمپ کی ریپبلکن جماعت کو سیاسی محاذ پر سخت چیلنجز کا سامنا ہے۔ تازہ سرویز کے مطابق ریپبلکنز کو ایوانِ نمائندگان (ہاؤس آف ریپریزنٹیٹوز) میں اپنی اکثریت کھونے کا خطرہ ہے، جبکہ سینیٹ میں بھی سخت مقابلے کی توقع کی جا رہی ہے۔

اگرچہ صدر ٹرمپ 3 نومبر کو ہونے والے انتخابات میں خود امیدوار نہیں ہوں گے، تاہم ان انتخابات کے نتائج ان کی صدارت کے مستقبل پر گہرے اثرات مرتب کر سکتے ہیں۔

ریپبلکن پارٹی پہلے ہی ہاؤس میں انتہائی معمولی اکثریت رکھتی ہے، جبکہ صدر کی مقبولیت کی شرح بھی کمزور سمجھی جا رہی ہے۔ دوسری جانب عوام میں بڑھتی مہنگائی، ایران کے ساتھ طویل کشیدگی اور روزمرہ زندگی کے بڑھتے اخراجات کے باعث بے چینی پائی جاتی ہے۔

ایران کے ساتھ تنازع کے باعث عالمی توانائی منڈیوں میں عدم استحکام پیدا ہوا ہے، جس کے نتیجے میں امریکہ میں پٹرول کی قیمت 4 ڈالر فی گیلن سے تجاوز کر گئی ہے۔ اس کے ساتھ ساتھ مہنگائی کی بلند شرح اور زیادہ شرح سود نے بھی عوامی مشکلات میں اضافہ کر دیا ہے۔

سیاسی مبصرین کے مطابق اگرچہ ایران کے ساتھ کشیدگی میں کمی اور مذاکرات کا آغاز صدر ٹرمپ کے لیے ایک مثبت پیش رفت ثابت ہو سکتا ہے، تاہم معاشی مسائل اور عوامی بے اطمینانی اب بھی ریپبلکن پارٹی کے لیے بڑے چیلنجز ہیں۔