خلیج اردو

لبنانی کاروباری شخص انطوان لباکی نے دبئی ڈیوٹی فری کے ملینیم ملینیئر ڈرا میں دوسری بار 10 لاکھ ڈالر کا انعام جیت لیا۔ 53 سالہ انطوان لباکی تعمیراتی کاروبار سے وابستہ ہیں اور وہ دبئی ڈیوٹی فری ملینیم ملینیئر پروموشن دو مرتبہ جیتنے والے دنیا کے صرف 12 افراد میں شامل ہوگئے ہیں۔

انطوان لباکی کا ٹکٹ نمبر 3360 تھا جو ملینیم ملینیئر سیریز 551 کے ڈرا میں منتخب ہوا۔ انہوں نے یہ ٹکٹ 17 جولائی کو آن لائن خریدا تھا جبکہ قرعہ اندازی دبئی انٹرنیشنل ایئرپورٹ پر ہوئی۔

لباکی اس سے قبل اگست 2018 میں بھی 10 لاکھ ڈالر کا انعام جیت چکے ہیں۔ اس کے علاوہ اگست 2004 میں دبئی ڈیوٹی فری فائنست سرپرائز پروموشن میں بی ایم ڈبلیو 745Li بھی جیت چکے ہیں۔ یوں دبئی ڈیوٹی فری سے یہ ان کا تیسرا بڑا انعام ہے۔

لباکی نے بتایا کہ تازہ ترین انعام جیتنے کی خبر انہیں بیروت میں اپنی بہن کے ساتھ کافی پیتے ہوئے ملی۔ فون کرنے والے شخص کی آواز پہچانتے ہی انہیں اندازہ ہوگیا تھا کہ وہ دوبارہ انعام جیت چکے ہیں۔ ان کی بہن یہ خبر سننے والی پہلی شخصیت تھیں جبکہ بعد میں اہلیہ اور تینوں بچے بھی خوشی میں شریک ہوگئے۔

پہلی بار جیتی رقم ضائع ہوگئی

لباکی نے بتایا کہ 2018 میں جیتی گئی 10 لاکھ ڈالر کی رقم انہوں نے بیروت منتقل کی تھی لیکن وہ اسے اپنے منصوبے کے مطابق استعمال نہ کرسکے اور رقم ضائع ہوگئی۔

اس تجربے کے بعد انہوں نے اس بار انعامی رقم کے استعمال کا منصوبہ تبدیل کردیا ہے۔ انطوان لباکی کا کہنا ہے کہ وہ تازہ ترین 10 لاکھ ڈالر دبئی میں رکھیں گے اور اسی شہر میں سرمایہ کاری کریں گے۔ وہ ممکنہ طور پر دبئی میں گھر خریدنے کے ساتھ اپنا کاروبار بھی شروع کرنے کا ارادہ رکھتے ہیں۔

لباکی کے مطابق وہ لبنان میں تعمیراتی کاروبار چلا رہے ہیں اور اب اسی نوعیت کا کاروبار متحدہ عرب امارات میں شروع کرنے پر غور کر رہے ہیں۔ ان کا کہنا ہے کہ دبئی منتقل ہونے کا خیال پہلے ہی ان کے ذہن میں تھا تاہم تازہ انعام نے ان کے اور ان کے خاندان کے لیے اس منصوبے کو مزید حقیقت پسندانہ بنا دیا ہے۔

انہوں نے دبئی کو دنیا کا بہترین اور محفوظ ترین شہر قرار دیتے ہوئے کہا کہ وہ اور ان کا خاندان دبئی کو بہت پسند کرتے ہیں۔

2004 سے دبئی ڈیوٹی فری کے ٹکٹ خرید رہے ہیں

انطوان لباکی کا دبئی ڈیوٹی فری کے ساتھ تعلق دو دہائیوں سے زیادہ پرانا ہے۔ انہوں نے 2004 میں دبئی انٹرنیشنل ایئرپورٹ سے گزرتے ہوئے جلدی میں ایک ٹکٹ خریدا تھا۔ بیروت پہنچنے کے اگلے روز انہیں فون پر بتایا گیا کہ وہ بی ایم ڈبلیو جیت چکے ہیں۔

بعد ازاں دبئی ڈیوٹی فری کی جانب سے 10 لاکھ ڈالر کے انعام کا سلسلہ شروع ہوا تو لباکی نے اس میں بھی حصہ لینا جاری رکھا۔ ان کا کہنا ہے کہ وہ ہر ماہ ٹکٹ نہیں خریدتے تھے بلکہ سال میں دو یا تین مرتبہ قرعہ اندازی میں شامل ہوتے تھے۔

لباکی نے کہا کہ انہیں دبئی اور دبئی ڈیوٹی فری پر اعتماد ہے اور اب وہ باقاعدگی سے ٹکٹ خریدنے کا ارادہ رکھتے ہیں۔ ان کے مطابق ممکن ہے کہ وہ اب ہر ماہ ٹکٹ خریدیں۔

تازہ کامیابی کے بعد لباکی اپنے خاندان کے ہمراہ دبئی آنے اور جیت کا جشن منانے کے ساتھ ساتھ سرمایہ کاری اور کاروبار شروع کرنے کے منصوبوں پر بھی کام کریں گے۔

ان کا کہنا ہے کہ دبئی ڈیوٹی فری نے تین مرتبہ ان کی زندگی بدلنے میں کردار ادا کیا ہے اور وہ دبئی کو اپنی زندگی کے لیے انتہائی اہم شہر سمجھتے ہیں۔