خلیج اردو

دبئی میں زیادہ سے زیادہ رہائشی اب صرف سرمایہ کاری کے مقصد سے نہیں بلکہ طویل مدت تک رہنے کے لیے گھر خرید رہے ہیں۔ پراپرٹی ڈویلپرز کے مطابق حکومتی اقدامات، بڑھتی آبادی اور دبئی میں مستقل بنیادوں پر رہنے والے افراد کی تعداد میں اضافے کے باعث گھر کی ملکیت کا رجحان تیزی سے بڑھ رہا ہے۔

اسپرنگ فیلڈ پراپرٹیز کے سی ای او فاروق سید کے مطابق سرمایہ کاری کے لیے پراپرٹی خریدنے والوں کی تعداد اب بھی نمایاں ہے تاہم مارکیٹ میں خریداروں کی ایک وسیع رینج شامل ہوگئی ہے۔ ان کے مطابق خریدار اب ایسے رہائشی علاقوں کو زیادہ اہمیت دے رہے ہیں جہاں طویل مدت تک آرام دہ زندگی گزاری جاسکے اور جہاں آمدورفت، سہولت اور معیار زندگی بہتر ہو۔

دبئی میں گھر خریدنے کو آسان بنانے کے لیے حکومتی اقدامات بھی اس رجحان کو تقویت دے رہے ہیں۔ دبئی لینڈ ڈیپارٹمنٹ کے مطابق فرسٹ ٹائم ہوم بائر پروگرام کے آغاز کے ایک سال کے دوران 3 ہزار 200 سے زائد افراد نے مجموعی طور پر 5 ارب درہم سے زیادہ مالیت کے گھر خریدے۔

ڈویلپرز کے مطابق غیر ملکی ماہرین، کاروباری افراد، خاندان اور پہلی مرتبہ گھر خریدنے والے ایسے افراد کی تعداد بڑھ رہی ہے جو آنے والے کئی برس دبئی میں رہنے کا ارادہ رکھتے ہیں۔

ڈگاستا پراپرٹیز کے بانی اور چیئرمین توصیف خان کا کہنا ہے کہ خریدار اب مختصر مدت کے منافع کے بجائے اس بات کو زیادہ اہمیت دے رہے ہیں کہ وہ اپنی زندگی کہاں گزارنا چاہتے ہیں۔

ان کے مطابق خاندان، کاروباری افراد اور پروفیشنلز اب کمیونٹی، آمدورفت، اسکولز، طرز زندگی کی سہولیات اور مجموعی معیار زندگی کو ترجیح دے رہے ہیں۔

بہت سے خریدار کئی برس سے متحدہ عرب امارات میں رہ رہے ہیں، اپنے کیریئر یا کاروبار قائم کرچکے ہیں اور اب مستقل گھر خریدنے کے لیے تیار ہیں۔ دبئی کا معاشی استحکام، کاروبار دوست ماحول اور طویل مدتی رہائش و گھر کی ملکیت کی حوصلہ افزائی کرنے والی حکومتی پالیسیاں بھی خریداروں کے اعتماد میں اضافہ کر رہی ہیں۔

کمیونٹی لائف کی اہمیت بڑھ گئی

ڈویلپرز کے مطابق خریدار اب رہائشی منصوبے کا انتخاب کرتے وقت صرف گھر یا عمارت کی خوبصورتی نہیں دیکھتے بلکہ پورے علاقے کے ماحول کو بھی اہمیت دیتے ہیں۔

ایسے منصوبوں کی طلب بڑھ رہی ہے جہاں پیدل چلنے کے لیے موزوں راستے، قریبی دکانیں، عوامی مقامات، بہتر ٹرانسپورٹ رابطہ اور رہائشی و کمیونٹی سہولیات ایک ہی جگہ دستیاب ہوں۔

فاروق سید کے مطابق خریدار پراپرٹی کے معیار کے ساتھ ساتھ قریبی سہولیات، گرین اسپیسز، ریٹیل، تعلیم اور مجموعی رہائشی ماحول کو بھی خاص اہمیت دے رہے ہیں۔

ڈویلپرز کا کہنا ہے کہ لگژری سہولیات اب بھی خریداروں کے لیے پرکشش ہیں لیکن طویل مدت میں ان کی قدر اس وقت زیادہ بڑھتی ہے جب وہ ایک مکمل اور منصوبہ بندی کے تحت قائم کمیونٹی کا حصہ ہوں۔

ماہرین کے مطابق دبئی کی رہائشی مارکیٹ مزید پختہ ہونے کے ساتھ ایسے منصوبوں کی قیمتیں طویل مدت میں زیادہ مستحکم رہنے کا امکان ہے جو معیاری گھروں، مربوط کمیونٹی پلاننگ اور طرز زندگی کی سہولیات کو ایک ساتھ پیش کرتے ہیں۔