خلیج اردو
بھارت میں بڑے پیمانے پر احتجاج منظم کرنے والی خود ساختہ پریشر گروپ کاکروچ جنتا پارٹی نے نوجوانوں کے مسائل جاننے کے لیے ملک گیر ’کیا بولتی پبلک‘ مہم شروع کرنے کا اعلان کر دیا۔
گروپ کے مطابق یکم ستمبر سے اس کی قیادت بھارت کے مختلف علاقوں کا دورہ کرے گی اور نوجوانوں سے براہ راست ملاقات کرکے ان کے مسائل، خدشات اور مطالبات سنے گی۔
مہم کے دوران حاصل ہونے والی معلومات کی بنیاد پر یوتھ ریفارم چارٹر تیار کیا جائے گا، جس کے لیے چار بنیادی شعبوں کا تعین کیا گیا ہے جن میں جامع تعلیمی اصلاحات، تعلیم اور روزگار کے درمیان بہتر رابطہ، ادارہ جاتی احتساب اور یکجہتی و اتحاد شامل ہیں۔
گروپ کے مطابق ان اصلاحات کے تحت تعلیمی نظام کے لیے جامع فریم ورک تیار کیا جائے گا، نصاب کو روزگار کی ضروریات کے مطابق بہتر بنایا جائے گا اور میڈیا کی ساکھ سمیت مختلف ادارہ جاتی معاملات پر توجہ دی جائے گی۔
کاکروچ جنتا پارٹی نے ملک گیر رکنیت مہم شروع کرنے کا بھی اعلان کیا ہے اور شہریوں کو تحریک میں شامل ہونے کی دعوت دی ہے۔
گروپ کے رہنما ابھیجیت ڈپکے نے بھارت میں میڈیکل امتحانات کے پرچے لیک ہونے کے خلاف احتجاجی تحریک کی قیادت کی تھی، جس کے نتیجے میں نئی دہلی سمیت مختلف شہروں میں ہزاروں نوجوان سڑکوں پر نکل آئے تھے۔
رپورٹ کے مطابق احتجاجی تحریک نے وزیراعظم نریندر مودی کی حکومت پر دباؤ بڑھایا اور بالآخر بھارتی وزیر تعلیم دھرمندر پردھان نے 25 جولائی کو استعفیٰ دے دیا۔
حکومت نے بعد ازاں امتحانی پرچوں کے لیک ہونے پر سخت سزاؤں کی حمایت کی اور امتحانی نظام کا جائزہ لینے کے لیے ایک پینل بھی قائم کیا۔
ابھیجیت ڈپکے کا کہنا ہے کہ وہ فوری طور پر سیاسی جماعت تشکیل نہیں دینا چاہتے کیونکہ انہیں خدشہ ہے کہ حکومت تحریک کو بدنام کرنے کے لیے اس کی قیادت کے خلاف تحقیقات شروع کر سکتی ہے۔
