خلیج اردو
بھارت کے مرکزی بورڈ برائے ثانوی تعلیم نے مشرق وسطیٰ کے سات ممالک میں بارہویں جماعت کے خصوصی امتحانات کی تاریخوں کا اعلان کردیا ہے۔ امتحانات 23 اکتوبر سے شروع ہوکر 28 اکتوبر 2026 تک جاری رہیں گے۔ امتحانات متحدہ عرب امارات، بحرین، ایران، کویت، عمان، قطر اور سعودی عرب میں منعقد ہوں گے، جہاں خطے میں جاری تنازع کے باعث معمول کے بورڈ امتحانات متاثر ہوئے تھے۔
سی بی ایس ای کی ویب سائٹ پر جاری کردہ ڈیٹ شیٹ کے مطابق خصوصی امتحانات 40 مضامین میں ہوں گے، جن میں 20 تعلیمی اور 20 مہارت پر مبنی مضامین شامل ہیں۔ یہ امتحانات ان طلبہ کو موقع فراہم کریں گے جن کے معمول کے امتحانات خطے کی صورت حال کے باعث منسوخ کردیے گئے تھے۔
سی بی ایس ای نے 15 مارچ 2026 کو مشرق وسطیٰ میں رہنے والے بارہویں جماعت کے طلبہ کے بورڈ امتحانات منسوخ کرنے کا اعلان کیا تھا۔ اس کے بعد 27 مارچ کو خصوصی جائزہ اسکیم متعارف کرائی گئی، جس کے تحت متاثرہ طلبہ کے نتائج جاری کیے گئے۔
خصوصی امتحانات میں وہی ریگولر طلبہ شرکت کرسکیں گے جن کا تعلق متاثرہ ممالک میں سی بی ایس ای سے منسلک سکولوں سے ہے، جن کے نام 2026 کے مرکزی امتحانات کے لیے امیدواروں کی فہرست میں شامل کیے گئے تھے اور جن کے نتائج خصوصی جائزہ اسکیم کے تحت جاری ہوئے تھے۔
طلبہ اپنی مرضی کے مضامین میں امتحان دینے کا انتخاب کرسکیں گے۔ نئے امتحانات میں حاصل کردہ نمبر پہلے جاری کیے گئے نتائج کی جگہ لیں گے اور خصوصی امتحان کا نتیجہ حتمی تصور کیا جائے گا۔
سی بی ایس ای کے خصوصی امتحانات معمول کے ضمنی امتحانات سے مختلف ہیں۔ ضمنی امتحانات عام طور پر ان طلبہ کے لیے ہوتے ہیں جنہیں کسی مضمون میں کمپارٹمنٹ کیٹیگری میں رکھا گیا ہو یا جو بورڈ کے قواعد کے مطابق اپنے نمبروں میں بہتری لانا چاہتے ہوں۔
