خلیج اردو
ابوظبہی: ابوظہبی کی بلدیاتی اتھارٹی نے شہری خوبصورتی کو برقرار رکھنے اور شہری ماحول کو منظم رکھنے کے لیے نئی ہدایات جاری کی ہیں، جن کے تحت عوامی سڑکوں کی جانب کھلنے والی کھڑکیوں یا بالکونیوں میں کپڑے خشک کرنے یا قالین دھونے پر بھاری جرمانے عائد کیے جائیں گے۔
بلدیات و ٹرانسپورٹ کے محکمے نے اتوار کے روز سوشل میڈیا پلیٹ فارم "ایکس” پر تنبیہ کی کہ اگر کسی رہائشی نے کھڑکیوں یا بالکونیوں میں دھلائی شدہ کپڑے یا قالین رکھے تو پہلی بار خلاف ورزی پر 500 درہم، دوسری بار پر 1,000 درہم اور تیسری بار یا مسلسل خلاف ورزی پر 2,000 درہم تک جرمانہ عائد کیا جائے گا۔
محکمہ نے واضح کیا کہ کھڑکیوں، بالکونیوں یا عمارت کے کسی بھی ایسے حصے میں جو عوامی سڑک کی طرف ہو، کپڑے یا قالین ڈالنا نہ صرف خلاف قانون ہے بلکہ یہ شہر کی خوبصورتی کو بھی متاثر کرتا ہے۔
ابوظہبی بلدیہ کے ایک سابقہ بیان میں کہا گیا تھا: "اپارٹمنٹ کی بالکونی یا کھڑکی سے کپڑے لٹکانا یا خشک کرنا عمارت کی ظاہری خوبصورتی کو خراب کرتا ہے اور اس کی اجازت نہیں دی جا سکتی۔”
گزشتہ ماہ ابوظہبی میں گندی یا لاوارث گاڑیوں کو سڑکوں پر چھوڑنے کے خلاف بھی نئے ضوابط اور سزائیں جاری کی گئی تھیں۔ ان ضوابط کے تحت گاڑی کو گندا یا عوامی جگہ پر لاوارث چھوڑنا شہری منظر کو خراب کرنے کے مترادف قرار دیا گیا ہے، جس پر بھاری جرمانے عائد کیے جائیں گے۔
