خلیج اردو
دبئی: مال آف دی ایمریٹس نے اپنے قیام کی 20ویں سالگرہ کے موقع پر 5 ارب درہم کی سرمایہ کاری سے ایک بڑے توسیعی منصوبے کا اعلان کر دیا ہے، جس کے تحت 100 نئے اسٹورز، ایک جدید تھیٹر، انڈور و آؤٹ ڈور ڈائننگ زون، تفریحی مقامات اور ویلنس سہولیات شامل کی جائیں گی۔
مجید الفطیم، جو اس مال کے مالک اور آپریٹر ہیں، نے بتایا ہے کہ اس توسیع کے لیے 20,000 مربع میٹر اضافی جگہ مختص کی گئی ہے، جس پر اب تک 1.1 ارب درہم خرچ کیے جا چکے ہیں۔ ان کا کہنا ہے کہ اس منصوبے کے نتائج بہت جلد زائرین کو دکھائی دینے لگیں گے کیونکہ مال کو ایک تجرباتی اور کثیر الحسی مقام میں تبدیل کیا جا رہا ہے۔
یہ توسیع "مال آف نیو پاسیبلیٹیز” کے وژن 2030 کا حصہ ہے، جس میں زائرین کو خریداری سے بڑھ کر تفریح، ثقافتی سرگرمیوں اور سہولت پر مبنی تجربات فراہم کیے جائیں گے۔
اس منصوبے کے تحت ایک نیا انڈور-آؤٹ ڈور علاقہ بنایا جائے گا جس میں فاسٹ کیژول ڈائننگ اور انٹرایکٹو انٹرٹینمنٹ شامل ہوگا۔ مال میں پہلی مرتبہ ایک آؤٹ ڈور ایف اینڈ بی کورٹ قائم کیا جائے گا، جو 2027 کے اوائل میں کھلے گا اور سرد موسم میں ایک سرسبز و شاداب تفریحی مقام میں تبدیل ہو سکے گا۔
اس کے علاوہ نیو کووینٹ گارڈن تھیٹر 2025 کے وسط میں سافٹ لانچ کیا جائے گا اور بعد ازاں سال کے اختتام پر باضابطہ افتتاح ہو گا۔ یہ تھیٹر 600 نشستوں اور ریہرسل کی سہولت کے ساتھ جدید طرز پر بنایا جائے گا۔
مال میں 2026 کے اختتام تک چار نئی تفریحی سہولیات متعارف کرائی جائیں گی، جن میں دنیا کا سب سے جدید IMAX سینما بھی شامل ہو گا جو VOX سینماز کے تحت کھولا جائے گا۔ ویسٹ اینڈ ڈسٹرکٹ کی تزئین و آرائش بھی اس منصوبے کا حصہ ہے تاکہ اسے ایک جدید اور سماجی مرکز میں بدلا جا سکے۔
مجید الفطیم گروپ کے سی ای او خلیفہ بن بریک نے کہا کہ مال آف دی ایمریٹس نے دو دہائیاں قبل خطے میں ریٹیل اور تفریح کی نئی مثال قائم کی تھی اور اب ہم اس ورثے کو ایک دلیرانہ سرمایہ کاری سے مزید آگے بڑھا رہے ہیں، جس کا مقصد صرف توسیع نہیں بلکہ ایسے مواقع فراہم کرنا ہے جہاں لوگ جڑ سکیں، آرام کر سکیں اور متاثر ہوں — سب کچھ ایک ہی مقام پر۔
