ابوظبی میں ڈزنی لینڈ کھلنے جا رہا ہے، مشرقِ وسطیٰ کا پہلا ڈزنی تھیم پارک ہوگا

خلیج اردو
متحدہ عرب امارات ایک اور عالمی سنگ میل عبور کرنے جا رہا ہے، کیونکہ جلد ہی ابوظبی میں مشرقِ وسطیٰ کا پہلا ڈزنی لینڈ تھیم پارک کھلنے جا رہا ہے۔ یہ دنیا بھر میں ساتواں ڈزنی ریزورٹ ہوگا اور یاس آئی لینڈ پر واقع ہوگا، جہاں اس "جادوئی” مقام کا باضابطہ اعلان ایک خصوصی تقریب کے دوران کیا گیا۔

ڈزنی کے سی ای او باب آئیگر نے اعلان کرتے ہوئے کہا:
"والٹ ڈزنی کمپنی کی 102 سالہ تاریخ میں کئی اہم لمحات آئے، لیکن 1955 میں پہلا ڈزنی لینڈ کھلنا ایک یادگار موقع تھا۔ آج، 70 برس بعد، چھ ڈزنی تھیم پارکس میں چار ارب سے زائد افراد کو تفریح فراہم کرنے کے بعد، ہم ایک اور یادگار موقع کا جشن منا رہے ہیں — ابوظبی میں ڈزنی تھیم پارک کے قیام کا اعلان۔”

باب آئیگر نے کہا کہ وہ اس منصوبے کے لیے نہایت پرجوش ہیں اور یہ پارک نہ صرف ڈزنی کی مشہور کہانیوں اور کرداروں کو پیش کرے گا بلکہ مقامی ثقافت اور ذوق کے ساتھ ہم آہنگ بھی ہوگا، یوں یہ دنیا کے اس اہم مقام پر تفریح کا ایک نیا سنگ میل بنے گا۔

اس موقع پر یاس آئی لینڈ کی 15 ویں سالگرہ بھی منائی گئی۔ محکمہ ثقافت و سیاحت ابوظبی کے چیئرمین محمد المبارک نے کہا:
"آج ایک تاریخی دن ہے۔ ہم 15 سالہ جدت، تخلیق اور کامیابی کا جشن منا رہے ہیں… لیکن اس کے ساتھ ساتھ کچھ بہت خاص، کچھ جادوئی اعلان بھی کر رہے ہیں۔”

ڈزنی چیف ایگزیکٹو نے بتایا کہ پارک میں جدید ترین ٹیکنالوجی، معاصر فن تعمیر، اور ڈزنی کا لازوال جادو ایک ساتھ مل کر مہمانوں کو ایک ناقابل فراموش تجربہ فراہم کریں گے۔