خلیج اردو
دبئی: جمعرات کے روز دبئی مارکیٹ کے آغاز پر سونے کی قیمت میں نمایاں کمی واقع ہوئی، جہاں فی گرام 9 درہم کی کمی دیکھی گئی۔
24 قیراط سونا جمعرات کی صبح 404 درہم فی گرام میں فروخت ہوا، جو بدھ کو مارکیٹ بند ہونے پر 409 درہم تھا۔ اسی طرح 22 قیراط کی قیمت 370.5 درہم، 21 قیراط کی 355.25 درہم اور 18 قیراط کی 304.5 درہم فی گرام رہی۔
عالمی مارکیٹ میں اسپاٹ گولڈ کی قیمت 1.45 فیصد کمی کے ساتھ 3,336.86 ڈالر فی اونس تک گر گئی، جس کی وجہ امریکی فیڈرل ریزرو کے چیئرمین جیروم پاول کے محتاط بیانات اور امریکہ و چین کے درمیان تجارتی کشیدگی میں نرمی بتائی جا رہی ہے۔
واشنگٹن اور بیجنگ نے اعلان کیا ہے کہ امریکی وزیر خزانہ اسکاٹ بیسنٹ اور تجارتی نمائندہ جیمی سن گریئر سوئٹزرلینڈ میں چین کے نائب وزیراعظم ہی لیفینگ سے مذاکرات کریں گے۔ یہ ملاقات اُس وقت کے بعد پہلی مرتبہ ہو گی جب ٹرمپ انتظامیہ نے چین پر سخت تجارتی پابندیاں عائد کی تھیں، جس سے دو بڑی معیشتوں کے درمیان ممکنہ معاہدے کی امیدیں بڑھ گئی ہیں۔
سینچری فنانشل کے چیف انویسٹمنٹ آفیسر وجے ویلیچا کا کہنا ہے کہ "جنوبی ایشیا میں بھارت اور پاکستان جیسے جوہری ممالک کے درمیان بڑھتی ہوئی فوجی کشیدگی سونے کے لیے سازگار سمجھی جاتی ہے، لیکن موجودہ حالات میں تجارتی مذاکرات کی امیدیں محفوظ سرمایہ کاری کی مانگ کو پسِ منظر میں دھکیل رہی ہیں۔”
ایف ایف اے کنگز کے بانی و سی ای او فادی الکردی نے کہا کہ "امریکہ اور چین کے درمیان ممکنہ مذاکرات کی امید نے سرمایہ کاروں میں اعتماد پیدا کیا ہے، اگرچہ تجارتی غیر یقینی صورتحال اب بھی برقرار ہے۔ مشرقی یورپ اور مشرق وسطیٰ میں بڑھتی ہوئی عالمی کشیدگی کے ساتھ ساتھ بھارت و پاکستان کے درمیان دوبارہ شروع ہونے والی محاذ آرائی سونے کی محفوظ پناہ گاہ کے طور پر اہمیت کو تقویت دیتی ہے۔
