خلیج اردو
ابوظہبی: متحدہ عرب امارات نے سوڈان میں جاری تنازع میں کسی بھی فریق کو اسلحہ فراہم کرنے کے الزامات کو سختی سے مسترد کر دیا ہے۔ سلام الجابری، معاون وزیر برائے سیکیورٹی و عسکری امور نے ایک بیان میں کہا کہ یو اے ای کو ایک غیر سرکاری تنظیم کی جانب سے شائع کردہ گمراہ کن رپورٹ کا علم ہے، جس میں سوڈان میں AH-4 ہووٹزر سسٹمز کی موجودگی کے حوالے سے الزامات لگائے گئے ہیں۔
انہوں نے واضح کیا کہ "یو اے ای کسی بھی فریق کو اسلحہ فراہم کرنے کے الزامات کو قطعی طور پر مسترد کرتا ہے۔ یہ الزامات بے بنیاد ہیں اور ان کے پیچھے کوئی مصدقہ ثبوت نہیں ہے۔”
سلام الجابری کے مطابق یو اے ای نے اقوام متحدہ کو بھی براہ راست اپنی پوزیشن سے آگاہ کیا ہے، اور سلامتی کونسل کے سوڈان پر پابندیوں کے حوالے سے ماہرین کے حالیہ رپورٹ میں بھی یو اے ای کے خلاف کسی قسم کا الزام موجود نہیں ہے، نہ ہی اس میں یو اے ای کی جانب سے اسلحہ منتقلی کا کوئی ذکر ہے۔
انہوں نے مزید کہا کہ رپورٹ میں جس ہووٹزر سسٹم کا ذکر ہے، وہ یو اے ای میں تیار نہیں کیا گیا بلکہ یہ گزشتہ ایک دہائی سے بین الاقوامی مارکیٹ میں دستیاب ہے، اور یہ کہنا کہ صرف ایک ملک نے اسے حاصل کیا ہے، سراسر غلط ہے۔
یو اے ای نے میڈیا اور اداروں پر زور دیا کہ کسی بھی قسم کی معلومات کو شائع کرنے سے پہلے اس کی تصدیق کو یقینی بنایا جائے تاکہ بے بنیاد الزامات سے گریز کیا جا سکے۔
