خلیج اردو
ابوظبی: محکمہ صحت ابوظبی نے مریضوں کو طبی معائنہ کیے بغیر صرف پیسوں کے عوض جعلی بیماری کی چھٹیاں جاری کرنے پر امارت میں واقع چار طبی مراکز کو بند کر دیا ہے۔ حکام نے ان مراکز کے تمام عملے کو ابتدائی طور پر پبلک پراسیکیوشن کے حوالے کرنے کا فیصلہ کیا ہے تاکہ ان کے خلاف مزید تحقیقات کی جا سکیں۔
محکمہ صحت کے مطابق یہ قدم سنگین قانونی خلاف ورزیوں کے باعث اٹھایا گیا ہے، جہاں مریض طبی سہولت پر آئے بغیر صرف پیسے دے کر چھٹی کی سند حاصل کر رہے تھے، جو کہ قانون کی صریح خلاف ورزی ہے۔ حکام نے اس عمل کو نہ صرف پیشہ ورانہ بدعنوانی قرار دیا بلکہ اسے عوامی اعتماد کو ٹھیس پہنچانے والا بھی کہا ہے۔
محکمہ صحت ابوظبی نے واضح کیا ہے کہ وہ صحت کے شعبے میں شفافیت، دیانت داری اور قانونی تقاضوں کو یقینی بنانے کے لیے سخت اقدامات اٹھا رہا ہے۔ اس حوالے سے مزید تحقیقات کے بعد اضافی قانونی کارروائیاں بھی متوقع ہیں۔
