بھارتی جارحیت نے خطے کو جنگ کے دہانے پر لاکھڑا کیا، پاکستان نے پہلے تحمل کا مظاہرہ کیا، حنا ربانی کھر

خلیج اردو
اسلام آباد، 13 مئی 2025:
وزیر مملکت برائے خارجہ امور حنا ربانی کھر نے کہا ہے کہ حالیہ بھارتی جارحیت نے دو ایٹمی طاقتوں کو ایک خطرناک تصادم کی طرف دھکیل دیا تھا، تاہم پاکستان نے ذمہ دار ریاست کے طور پر پہلے تحمل اور برداشت کا مظاہرہ کیا۔ انہوں نے کہا کہ پاکستان نے سفارتی اور عسکری دونوں محاذوں پر بھارت کے غیر ذمہ دارانہ رویے کو بے نقاب کیا۔

اسلام آباد میں میڈیا سے گفتگو کرتے ہوئے حنا ربانی کھر نے بھارتی وزیر اعظم نریندر مودی پر شدید تنقید کرتے ہوئے کہا کہ وہ انتہا پسندی اور ہندوتوا کے ایجنڈے پر کارفرما ہیں اور اس سوچ کو دنیا بھر میں پھیلانے کی کوشش کر رہے ہیں۔ انہوں نے کہا کہ بھارت نے نہ صرف خطے کے امن کو خطرے میں ڈالا بلکہ اپنی کارروائیوں سے عالمی قوانین اور انسانی حقوق کی بھی صریح خلاف ورزی کی۔

انہوں نے کہا کہ جعفر ایکسپریس پر حالیہ حملے میں بھارت کے ملوث ہونے کے ٹھوس شواہد موجود ہیں اور پاکستان عالمی برادری کو ان شواہد سے آگاہ کرے گا۔
حنا ربانی کھر نے کہا کہ بھارت کا رویہ خطے میں عدم استحکام کا باعث بن رہا ہے اور عالمی برادری کو اس کا نوٹس لینا چاہیے۔

ان کا کہنا تھا کہ پاکستان خطے میں امن کا خواہاں ہے لیکن اپنی خودمختاری اور قومی سلامتی پر کوئی سمجھوتہ نہیں کرے گا۔