خلیج اردو
دبئی: مشرق وسطیٰ میں ایران اور اسرائیل کے درمیان جاری کشیدگی کے اثرات متحدہ عرب امارات میں سیاحت کے رجحانات پر بھی واضح ہو رہے ہیں۔ حالیہ حالات کے باعث یو اے ای کے کئی شہریوں نے اپنی چھٹیاں یا تو ملتوی کر دی ہیں یا ایسے ممالک کا انتخاب بدل لیا ہے جہاں صورتحال زیادہ پرامن اور بجٹ کے مطابق ہو۔
ٹریول ایجنٹس کے مطابق، جارجیا، آرمینیا اور آذربائیجان جیسے ممالک کے لیے بکنگز منسوخ ہونے کے بعد اب سیاح تھائی لینڈ، ویتنام، لاؤس، چین، جاپان اور سری لنکا جیسے جنوب مشرقی اور مشرقی ایشیائی ممالک کا رخ کر رہے ہیں۔
وائز فاکس ٹورازم کے سینئر مینیجر صبیر تھیکے پوراتھ ولاپل کا کہنا ہے کہ "موسم گرما کی چھٹیوں میں سیاح اب مشرقی سمت دیکھ رہے ہیں۔ خاص طور پر مون سون کے پُرسکون اور خوشگوار موسم سے لطف اندوز ہونے کے خواہش مند افراد تھائی لینڈ، سری لنکا اور بھارت جیسے ممالک کا انتخاب کر رہے ہیں۔”
انہوں نے بتایا کہ "بارشوں میں بھیگی کیرالہ کی سبز وادیوں، ہماچل کے پہاڑی علاقوں اور سری لنکا کی چائے کے باغات میں وقت گزارنے کا رجحان بڑھ رہا ہے۔ یہ ایک منفرد تجربہ ہے – پُرسکون، ٹھنڈا اور تروتازہ۔”
پلوٹو ٹریولز کے مینیجنگ پارٹنر بھرت ایداسانی کا کہنا تھا کہ ایشیائی ممالک کے ساتھ ساتھ اب افریقی مقامات کے لیے بھی دلچسپی میں اضافہ دیکھنے میں آ رہا ہے۔ انہوں نے کہا کہ "کاکیشس خطے کی فضائی حدود کی بندش اور پروازوں کی منسوخی کے باعث اب لوگ متبادل مقامات، بالخصوص بجٹ فرینڈلی ممالک، کو ترجیح دے رہے ہیں۔”
سیاحت میں اس تبدیلی کی ایک بڑی وجہ آسان ویزا پالیسی بھی ہے۔ جنوب مشرقی ایشیائی ممالک میں ویزا آن ارائیول یا ای ویزا کی سہولت دستیاب ہے، جو سیاحوں کے لیے پرکشش ہے۔
بھرت ایداسانی کے مطابق "خاندان اب محفوظ، آسان رسائی والے اور لچکدار سفری تجربات کو ترجیح دے رہے ہیں۔ ان کے لیے ویزا دوستانہ پالیسی اہم بن چکی ہے۔”
سب سے بڑا محرک بجٹ بھی ہے۔ جنوب مشرقی ایشیا سیاحت، ثقافت اور قدرتی حسن کے ساتھ کم خرچ سفر کی سہولت فراہم کرتا ہے۔ صبیر کے مطابق، "یہ مقامات نہ صرف سستے ہیں بلکہ اس وقت موسم بھی نہایت خوشگوار ہے، اور اسکولوں کی چھٹیاں ہونے کی وجہ سے خاندان اس موقع کو بھرپور انداز میں استعمال کرنا چاہتے ہیں۔
