یو اے ای میں لمبی پروازیں خون جمنے کے خطرات بڑھا سکتی ہیں، ڈاکٹرز کی وارننگ

خلیج اردو
گرمیوں کے سفری موسم میں اضافے کے ساتھ، متحدہ عرب امارات کے ماہرین صحت نے خبردار کیا ہے کہ طویل ہوائی سفر بعض افراد کے لیے جان لیوا پیچیدگیوں کا باعث بن سکتا ہے، خاص طور پر ان لوگوں کے لیے جنہیں پہلے سے صحت کے مسائل لاحق ہیں۔ ڈاکٹرز نے مشورہ دیا ہے کہ سفر سے قبل میڈیکل کلیئرنس حاصل کی جائے اور پرواز کے بعد سینے میں درد یا ٹانگ میں سوجن جیسے علامات کو ہرگز نظر انداز نہ کیا جائے۔

RAK اسپتال کے مطابق، برطانیہ سے 8 گھنٹے کی پرواز کے بعد واپس آنے والے ایک رہائشی کو شدید پھیپھڑوں کی تکلیف لاحق ہوئی، جو دراصل پلمونری ایمبولزم (PE) یعنی پھیپھڑوں میں خون کے لوتھڑے کی بیماری تھی۔ وہ شخص تین دن سے مسلسل سینے کے درد کی شکایت کے ساتھ ایمرجنسی ڈیپارٹمنٹ پہنچا، جہاں فوری تشخیص اور علاج کیا گیا۔

ڈاکٹرز کے مطابق یہ کیس واضح کرتا ہے کہ پرواز کے دوران طویل عرصے تک ایک ہی حالت میں بیٹھے رہنا خون جمنے (DVT) کے خطرات میں اضافہ کرتا ہے، جو بعد میں پھیپھڑوں تک پہنچ کر خون کی روانی کو روک سکتا ہے۔

کون لوگ زیادہ خطرے میں ہیں؟

برجیل ڈے سرجری سینٹر، الشہامہ کی فیملی میڈیسن اسپیشلسٹ ڈاکٹر ماریان ملک کے مطابق، درج ذیل افراد کو طویل پرواز سے قبل لازمی طور پر اپنے معالج سے مشورہ کرنا چاہیے:

• دل کی بیماری یا حالیہ سرجری کے مریض

• دائمی سانس کی بیماریاں جیسے دمہ یا COPD

• بے قابو ذیابیطس

• حالیہ بیماری جیسے نمونیا یا کووڈ-19

• خطرناک حمل، خاص طور پر تیسری سہ ماہی

• ماضی میں خون جمنے کی تاریخ رکھنے والے افراد

ڈاکٹر ماریان کے مطابق، “سفر سے قبل معائنہ اس بات کا تعین کرنے میں مدد دیتا ہے کہ کیا مریض کو آکسیجن یا خون پتلا کرنے والی دوا کی ضرورت ہے یا نہیں۔”

سفر کے دوران احتیاطی تدابیر

ماہرین صحت نے طویل ہوائی سفر کے دوران درج ذیل احتیاطی تدابیر اختیار کرنے کی سفارش کی ہے:

• ہر 1 سے 2 گھنٹے بعد اٹھ کر چلنا

• پانی کا زیادہ استعمال، الکحل، کیفین اور سگریٹ سے پرہیز

• اگر ڈاکٹر تجویز کرے تو کمپریشن اسٹاکنگ پہننا

• ایسی نیند آور دوا سے اجتناب جو حرکت میں رکاوٹ بنے

کینسر یا خون جمنے کی مخصوص بیماریوں میں مبتلا مسافروں کو، انفرادی خطرے کی بنیاد پر، پرواز سے قبل خون پتلا کرنے والی دوا دی جا سکتی ہے۔

خطرناک علامات کو نظر انداز نہ کریں

ڈاکٹرز کے مطابق خون جمنے کی علامات پرواز کے دوران یا کئی دن بعد بھی ظاہر ہو سکتی ہیں۔ اہم علامات درج ذیل ہیں:

• سینے میں اچانک درد یا جکڑن

• سانس لینے میں دشواری

• ایک ٹانگ میں درد یا سوجن

• تیز دھڑکن یا دل کی بے ترتیبی

• چکر آنا یا بے ہوشی

• کھانسی کے ساتھ خون آنا

RAK اسپتال کی ڈاکٹر سہا الشیخ سلمان کا کہنا ہے:
“یہ علامات صرف تھکن یا جیٹ لیگ کی نہیں بلکہ سنگین بیماری کی علامت ہو سکتی ہیں، جنہیں نظر انداز کرنے سے جان کو خطرہ لاحق ہو سکتا ہے۔”

پرواز کے دوران کیا کریں؟

اگر پرواز کے دوران علامات ظاہر ہوں تو فوری طور پر کیبن عملے کو مطلع کریں۔ ڈاکٹر ماریان نے بتایا، "زیادہ تر ایئر لائنز کے پاس پرواز کے دوران ایمرجنسی طبی سہولیات موجود ہوتی ہیں۔ اگر آکسیجن دستیاب ہو تو یہ سانس کی دشواری میں مددگار ہو سکتی ہے۔ ٹانگ کی سوجن کی صورت میں اسے اوپر اٹھانا اور دباؤ کم کرنا چاہیے، اور اترنے کے بعد فوری طور پر ڈاکٹر سے رجوع کیا جائے۔”

ماہرین کا کہنا ہے کہ پلمونری ایمبولزم ایک قابلِ علاج اور قابلِ پرہیز بیماری ہے، اور بروقت آگاہی اور تیاری سے زندگیاں بچائی جا سکتی ہیں۔