خلیج اردو
دبئی: برطانوی نوجوان مارکس فکانا، جسے متحدہ عرب امارات میں ایک کم عمر برطانوی لڑکی کے ساتھ جسمانی تعلقات قائم کرنے پر قید کی سزا سنائی گئی تھی، عید الاضحیٰ کے موقع پر شاہی معافی کے تحت رہا کر دیا گیا ہے۔
دبئی حکومت کے میڈیا دفتر کی جانب سے پیر کے روز خلیج ٹائمز کو موصول ہونے والے بیان کے مطابق، مارکس فکانا کو 3 جون 2025 کو رہا کیا گیا۔ یہ رہائی نائب صدر و وزیر اعظم یو اے ای اور دبئی کے حکمران شیخ محمد بن راشد آل مکتوم کی جانب سے 985 قیدیوں کے لیے جاری کردہ شاہی معافی کا حصہ تھی، جو مختلف قومیتوں سے تعلق رکھتے ہیں۔
بی بی سی کی رپورٹ کے مطابق، 19 سالہ مارکس فکانا کا تعلق شمالی لندن کے علاقے ٹوٹنہم سے ہے۔ انہیں دسمبر میں ایک سال قید کی سزا سنائی گئی تھی، جب یہ ثابت ہوا کہ انہوں نے دبئی میں قیام کے دوران ایک 17 سالہ برطانوی لڑکی سے باہمی رضامندی سے جسمانی تعلق قائم کیا تھا۔ متحدہ عرب امارات میں عمرِ رضامندی (age of consent) کی حد 18 سال مقرر ہے، جس کی خلاف ورزی پر سزا سنائی گئی۔
برطانیہ کے فارن، کامن ویلتھ اینڈ ڈویلپمنٹ آفس (FCDO) کے ترجمان نے تصدیق کی کہ مارکس فکانا کو "عید پر دی گئی معافی” کے تحت رہا کیا گیا۔ بیان میں مزید کہا گیا: "ہمیں علم ہے کہ وہ خاموشی سے واپس برطانیہ جانا چاہتے تھے تاکہ اہلِ خانہ سے ملاقات کر سکیں۔ ہم نے ان کی حمایت کی اور اہلِ خانہ سے مسلسل رابطے میں رہے۔”
متحدہ عرب امارات میں اہم مذہبی اور قومی مواقع، جیسا کہ عید الفطر، عید الاضحیٰ اور قومی دن، کے موقع پر قیدیوں کو معاف کرنے کی روایت طویل عرصے سے چلی آ رہی ہے۔ حالیہ معافی کے تحت صدر شیخ محمد بن زاید النہیان نے بھی 963 قیدیوں کو رہا کرنے کے احکامات جاری کیے تھے۔
ان معافیوں کا مقصد قیدیوں کی اصلاح اور انہیں دوبارہ معاشرے کا مفید فرد بنانے کا موقع فراہم کرنا ہوتا ہے، جو یو اے ای کے رحم دلی اور برداشت پر مبنی عدالتی اور سماجی وژن کا مظہر ہے۔
