خلیج اردو
فجیرہ: فجیرہ اسپتال کے ڈاکٹرز نے ایک مریضہ کو بچا لیا جس کا دل شدید ہارٹ اٹیک کے بعد تقریباً 40 منٹ تک بند رہا۔
مریضہ کو اچانک دل بند ہونے کے بعد فوری طور پر اسپتال کے ایمرجنسی ڈیپارٹمنٹ میں لایا گیا، جہاں ماہر طبی ٹیم نے جدید طبی طریقۂ کار استعمال کرتے ہوئے مسلسل جدوجہد کے بعد ان کا دل بحال کیا اور بغیر کسی پیچیدگی کے زندگی بچالی۔ یہ بات امارات ہیلتھ سروسز نے بتائی جو اسپتال کی نگرانی کرتی ہے۔
فجیرہ اسپتال کے ڈائریکٹر ڈاکٹر احمد عبید الخدیم نے اس کامیاب کیس کو اسپتال کی تیاری اور طبی عملے کی مہارت کا ثبوت قرار دیا۔ انہوں نے کہا کہ یہ کامیابی ٹیم ورک اور فوری ردعمل کی عکاسی کرتی ہے، جو اس بات کی یقین دہانی ہے کہ مریضوں کو محفوظ اور جدید طبی سہولیات فراہم کی جا رہی ہیں۔
اسپتال کے امراض قلب کے سربراہ ڈاکٹر ثائر خازم نے کہا کہ ایمرجنسی اور کارڈیالوجی ٹیموں کے درمیان بروقت ہم آہنگی مریضہ کی جان بچانے میں بنیادی حیثیت رکھتی ہے۔
انہوں نے مزید کہا کہ طویل دورانئے کے باوجود مربوط ردعمل نے مریضہ کی جان بچانے اور مکمل صحت یابی ممکن بنائی۔
