خلیج اردو
ابوظہبی: متحدہ عرب امارات نے اسرائیلی نائب سفیر ڈیوڈ احد ہورسانڈی کو طلب کر کے قطر پر اسرائیلی حملے اور وزیر اعظم نیتن یاہو کے اشتعال انگیز بیانات پر شدید مذمت اور سخت ناپسندیدگی کا اظہار کیا۔
وزیر مملکت برائے بین الاقوامی تعاون ریِم بنت ابراہیم الہاشمی نے سفیر کو طلب کر کے واضح کیا کہ یہ غیر ذمہ دارانہ حملہ قطر کی خودمختاری کی کھلی خلاف ورزی ہے۔ انہوں نے کہا کہ یہ اقدام بین الاقوامی قوانین اور اقوام متحدہ کے چارٹر پر سنگین حملہ اور خطے کے امن و استحکام کے لیے شدید خطرہ ہے۔
الہاشمی نے زور دیا کہ قطر کی سلامتی اور استحکام خلیجی تعاون کونسل (جی سی سی) کے رکن ممالک کی اجتماعی سلامتی کا حصہ ہے، اور کسی ایک خلیجی ملک پر حملہ دراصل پورے خلیجی سلامتی نظام پر حملہ ہے۔
انہوں نے کہا کہ جارحانہ اور اشتعال انگیز رویے کا تسلسل استحکام کے مواقع کو نقصان پہنچاتا ہے، خطے کو نہایت خطرناک راستے پر دھکیل رہا ہے اور ایک ایسا ماحول پیدا کر رہا ہے جسے ہرگز برداشت یا قبول نہیں کیا جا سکتا۔
